Şirkətlər niyə ASC-dən MMC-yə keçir?

Bəzən şirkətlərin Açıq Səhmdar Cəmiyyəti (ASC) statusundan imtina edib, Məhdud Məsuliyyətli Cəmiyyət (MMC) kimi fəaliyyət göstərməyə başladığını görürük. Maraqlıdır, şirkətlər niyə ASC-dən MMC-yə keçirlər.

Mövzu ilə bağlı iqtisadçı Rauf Qarayev Valyuta.az-a açıqlamasında ASC-dən MMC-yə keçidin arxasında duran əsas səbəbləri izah edib.

“MMC-də vergi və məsuliyyət yükü daha yüngüldür”

Ekspert bildirir ki, MMC-lərdə məsuliyyət daha məhduddur və vergi yükü ASC-lərlə müqayisədə nisbətən aşağıdır: “MMC-də hər kəs yalnız qoyduğu pay qədər məsuliyyət daşıyır. Dividend bölgüsü də daha çevikdir. ASC-də isə həm vergi, həm də korporativ idarəetmə baxımından öhdəliklər daha da ağırdır. Üstün cəhətləri olsa da, bir çox şirkət üçün ASC modelinin saxlanması kommersiya baxımından sərfəli olmur". 

Dividend bölgüsü MMC-də daha sadədir

Rauf Qarayevin sözlərinə görə, sahibkarlar MMC-ni daha praktik hesab etmələrinin əsas səbəblərindən biri dividend prosesinin sadəliyidir: “MMC-də iştirakçı qoyduğu kapitalı dividend şəklində daha birbaşa və rahat şəkildə götürə bilir. ASC-də dividend bölgüsü çoxprosesslidir və hüquqi prosedurlar daha sərtdir. Sahibkarlar isə gəlirin bölgüsündə çevik sistemə üstünlük verirlər”.

Ekspert əlavə edir ki, MMC-də tez-tez rast gəlinən model belədir: sahibkar həm payçı, həm də direktor olur. Bu isə idarəetməni daha yüngülləşdirir.

ASC-nin idarə olunması daha baha başa gəlir

İqtisadçıya görə ASC-nin saxlanması üçün əlavə resurslar tələb olunur: “ASC-lərdə audit tələbləri, illik hesabatlılıq, korporativ strukturun saxlanması kimi xərclər çox olur. Bu səbəbdən kiçik və orta ölçülü şirkətlər ASC modelinin idarə edilməsində çətinlik çəkirlər. MMC-ni idarə etmək daha ucuz və daha çevikdir”.

Sərvanə Rəmixanova