Avropa paytaxtı dünyanın ən yaşanmalı şəhəri seçildi - TOP-10

Yeni qlobal reytinqə əsasən, Avropanın 38 şəhəri dünyanın ən komfortlu 50 şəhəri siyahısına daxil edilib və ən yaxşı şəhər kimi İsveçrənin paytaxtı Bern seçilib. 

Valyuta.az "TimeOut"a istinadən xəbər verir ki, qiymətləndirmədə təhlükəsizlik, yaşayış keyfiyyəti, tibb xidməti, infrastruktur və digər vacib meyarlar nəzərə alınıb.

"ECA International" 2025–2026-cı illər üçün yaşayış reytinqini hazırlamaq məqsədilə 275 şəhəri bir sıra göstəricilər üzrə təhlil edib: infrastrukturun vəziyyəti, hava təmizliyi, səhiyyə xidmətlərinə çıxış, şəxsi təhlükəsizlik, siyasi sabitlik, sosial əlaqələr, asudə vaxt imkanları, yaşayış və kommunal xidmətlərin səviyyəsi, eləcə də iqlim.

Nəticə qəti olub: Avropa ilk 10 yeri tam şəkildə tutub və qalib Bern seçilib.

Qurum bildirib ki, bu nəticə onilliklər boyunca təmiz ətraf mühitə, yüksəkkeyfiyyətli tibbi xidmətə və nəqliyyat infrastrukturuna yatırılan investisiyanın göstəricisidir. Eyni zamanda, heç bir Avropa şəhəri siyahının ən zəif nəticə göstərənlər sırasına düşməyib.

Bern gözəl və sakit şəhərdir, Aare çayının döngəsi ətrafında salınıb. Onun orta əsrlərə aid Altstadt adlanan qədim mərkəzi XII əsrə gedib çıxır.

Xüsusilə məşhur məkanlar arasında Marzili çimərlik zonası – şəffaf firuzəyi suları ilə tanınan sevimli çimmə yeri, eləcə də konsert, teatr və kino nümayişlərinin keçirildiyi “Reitschule” mədəniyyət mərkəzi var.

İsveçrə yüksək həyat səviyyəsi ilə yanaşı bahalığı ilə də tanınır. ECA reytinqinə daxil olan şəhərlərin əksəriyyəti həm də kirayə və qida üzrə ən bahalı şəhərlər siyahılarında yer alır. Beləliklə, komfortlu həyat tərzi heç də ucuz deyil.

Dünyanın ən komfortlu və ən təhlükəsiz 10 şəhəri:

1. Bern, İsveçrə
2. Kopenhagen, Danimarka
3. Stavanqer, Norveç
4. Cenevrə, İsveçrə
5. Lüksemburq, Lüksemburq
6. Haaqa, Niderland
7. Vyana, Avstriya
8. Münhen, Almaniya
9. Dublin, İrlandiya
10. Lissabon, Portuqaliya

Paşa Məmmədli