“Thodex” birjasının qurucusu Faruk həbsxanada ölü tapılıb - 2 milyard dollarlıq iş...

“Thodex” adlı kriptovalyuta birjasının qurucusu Faruk Fatih Özer Türkiyədə saxlandığı cəzaçəkmə müəssisəsində ölü tapılıb.

Valyuta.Az Türkiyə mətbuatında istinadən xəbər verir ki, Özer Tekirdağdakı həbsxanada bir nəfərlik kamerada saxlanılırdı. Onun meyiti bu gün səhər saatlarında kameranın hamam otağında asılmış vəziyyətdə aşkarlanıb.

İlkin ehtimallara görə, hadisə intihar kimi qiymətləndirilir. Lakin faktla bağlı istintaq başladılıb, ölüm səbəbinin dəqiq müəyyən olunması üçün ekspertiza təyin edilib.

Xatırladaq ki, Faruk Fatih Özer “Thodex” birjası vasitəsilə minlərlə sərmayədarı aldadaraq ölkədən qaçmışdı. O, hüquq-mühafizə orqanlarından uzun müddət gizlənsə də, 2022-ci il avqustun 30-da Albaniyada saxlanılıb və daha sonra Türkiyəyə ekstradisiya olunub.

Məhkəmə Özeri “cinayətkar təşkilat qurmaq, idarə etmək və təşkilata üzv olmaq”, “külli miqdarda dələduzluq” və “çirkli pulların yuyulması” ittihamları ilə ümumilikdə 11 min 190 il 6 ay müddətinə azadlıqdan məhrum edib.

İttiham aktına əsasən, “Thodex” birjası vasitəsilə dəymiş zərər 356 milyon lirə (təxminən 13 milyon ABŞ dolları) olaraq göstərilib. Lakin Türkiyə mediasında bu rəqəmin əslində 2 milyard dollara qədər yüksəldiyi iddia olunur.

Hadisə ictimaiyyətdə ciddi rezonansa səbəb olub və kriptovalyuta sektorunda nəzarət və tənzimləmə mexanizmlərinin yenidən nəzərdən keçirilməsinə dair çağırışlar səsləndirilib.