"Apple" "iPhone Pro"nun dizaynını kökündən dəyişdirəcək

“iPhone 18 Pro” və “iPhone 18 Pro Max” modellərinin ön paneli 2022-ci ildən bəri ilk dəfə ciddi dəyişikliklərə məruz qalacaq. 

Valyuta.az xəbər verir ki, “The Information” nəşrinin məlumatına görə, həmin il “Dynamic Island” ilə təchiz olunmuş “iPhone 14 Pro” təqdim edilmişdi.

Məlumata görə, “Apple” "Face ID"ni və digər sensorları displeyin altına yerləşdirməyi planlaşdırır, ön kamera üçün isə yalnız kiçik bir dəlik saxlanılacaq. Selfi kamerasının sol yuxarı küncə köçürülməsi nəzərdə tutulur.

Bu dəyişikliklər nəticəsində “iPhone 18 Pro” modellərində ekranın yuxarı hissəsində “Dynamic Island” texnologiyası ilə yaradılmış həb formasında çıxıntı olmayacaq. Bununla yanaşı, cihazların ümumi dizaynı “iPhone 17 Pro”ya yaxın qalacaq və korpusda radikal yenilənmə gözlənilmir.

“The Information” mənbələri kamera ilə bağlı əvvəlki sızıntıları da təsdiqləyir. Belə ki, növbəti flaqman “iPhone” modelləri dəyişən diafraqmalı kamera əldə edəcək. Bu, matrisaya düşən işıq miqdarını peşəkar fotoaparatlarda olduğu kimi idarə etməyə imkan verəcək.

“iPhone 18 Pro” və “iPhone 18 Pro Max” modellərinin 2026-cı ilin sentyabrında “iPhone Fold” və “iPhone Air 2” ilə birlikdə təqdim ediləcəyi gözlənilir. Baza “iPhone 18” isə məlumatlar təsdiqlənərsə, 2027-ci ilin əvvəlində “iPhone 18e” ilə birgə satışa çıxacaq.

Qeyd edək ki, yaxın vaxtlarda yayılan genişmiqyaslı sızıntı “Apple”ın 30-dan çox yeni cihazı haqqında məlumatı üzə çıxarıb. Onların bir qismi, o cümlədən “AirTag 2”, yeni “iPad” və ağıllı ev üçün hub yaxın aylarda təqdim oluna bilər.

Paşa Məmmədli