Azərbaycan startapı "TechCrunch Road 2 Battlefield 2025"in finalında

Azərbaycanlı Yaqub Rəhimovun qurduğu "Polygraf AI" süni intellekt startapı TechCrunch Road 2 Battlefield 2025 yarışmasının finalına yüksəlib. 

"TechCrunch Road 2 Battlefield" nədir?

Valyuta.Az xəbər verir ki, "TechCrunch Startup Battlefield", dünyanın ən nüfuzlu texnologiya tədbirlərindən biri olan TechCrunch Disrupt-un əsas hissəsidir. Bu il tədbir 27–29 oktyabr 2025-ci il tarixlərində San-Fransiskoda baş tutacaq. Finalçılar layihələrini Silikon Vadisinin aparıcı investorlarına, media nümayəndələrinə və texnologiya liderlərinə təqdim edəcəklər.

Mərkəzi Avrasiya üzrə seçimlərə 27 ölkədən 485 müraciət daxil olub. 21 iyul – 13 avqust tarixləri arasında keçirilən seçim turlarının nəticəsində yalnız 20 startap finala vəsiqə qazanıb. 15 avqustda Astanada keçiriləcək finalda isə cəmi 3 qalib seçilərək Startup Battlefield 200 səhnəsinə birbaşa keçid əldə edəcək.

Polygraf AI — Azərbaycanın süni intellekt innovasiyası

Polygraf AI-nin xüsusi hazırlanmış Kiçik Dil Modelləri (SLM) agentləri süni intellekt təhlükəsizliyi sahəsində mühüm texnoloji irəliləyişlərdən biridir. Böyük Dil Modellərindən (LLM) fərqli olaraq, SLM-lər daha az hesablama resursu tələb edir və məlumat təhlükəsizliyi risklərini azaldır. Polygraf AI-nin SLM texnologiyası müəssisələrin daxili infrastrukturuna inteqrasiya edilərək, məlumat sızmalarının və AI əsaslı fırıldaqçılığın qarşısını almağa kömək edir.

Şirkətin təsisçisi Yaqub Rəhimov, maliyyə texnologiyaları və süni intellekt sahəsində beynəlxalq təcrübəyə malikdir. O, ABŞ-da bir sıra uğurlu layihələr reallaşdırıb və “Polygraf AI” ilə qlobal miqyasda informasiya təhlükəsizliyi problemlərinə innovativ həllər təqdim etməyi hədəfləyir.

Bu il Polygraf AI dünyanın ən nüfuzlu innovasiya yarışlarından biri olan SXSW Pitch 2025-də bütün kateqoriyalar üzrə ən yaxşı startap seçilərək "Best in Show" mükafatını qazanıb.

Şirkətin baş ofisi Austin, Texasda yerləşir.

TechCrunch Road 2 Battlefield 2025 finalçıları

Azərbaycan: Polygraf AI

Gürcüstan: QuickShipper

Qazaxıstan: Mirai Tech, NeuroGuard AI, FabStory AI, Investbanq, ARLAN BIOTECH, Snory, Biometric.vision

Qırğızıstan: Hi Doctor Ltd.

Monqoliya, Tacikistan, Türkmənistan: SEM Technologies LLC

ABŞ: Surfaice

Türkiyə: Pikare SkySource

Özbəkistan: Mila4AI, HaWoO2, LYDYA, ZERO WASTE, Jobster.hr

Növbəti hədəf — Silikon Vadisi

15 avqust 2025 tarixində keçiriləcək final “Polygraf AI” üçün beynəlxalq tanıtım və sərmayə imkanları baxımından əvəzsiz şansdır. Qaliblər TechCrunch Disrupt 2025 çərçivəsində Silikon Vadisinin ən böyük startap səhnəsində — Startup Battlefield 200-də çıxış edəcəklər.

Aydın