Çin "Meta"nın "Manus" alışını dayandırdı

"Meta Platforms"ın süni intellekt tətbiqi "Manus"u satın alması Çin tərəfindən dayandırılıb.

Valyuta.az xəbər verir ki, Çinin Milli İnkişaf və İslahat Komissiyası (NDRC) sözügedən əməliyyatın ölkənin investisiya qaydalarına zidd olduğunu açıqlayıb. Qurumun qərarına əsasən, satış ləğv edilib və tərəflərin ödənilən məbləği geri qaytarması tələb olunub.

Araşdırma nəticəsində "Manus"un xarici şirkətə ötürülməsinin mövcud qanunvericiliyə uyğun olmadığı bildirilib.

Bildirək ki, "Manus" çoxmərhələli tapşırıqları avtonom şəkildə yerinə yetirə bilən süni intellekt agenti kimi tanınır. Tətbiq ilk dəfə 2025-ci ilin martında bazara çıxarılıb.

Bundan əvvəl "Meta Platforms"un "Manus"u 2025-ci ilin dekabrında təxminən 2-3 milyard dollar qarşılığında aldığı iddia edilirdi. Lakin şirkət müqavilənin maliyyə detalları barədə rəsmi məlumat vermədi.

Məlumata görə, satınalmadan sonra "Manus" texnologiyasının "WhatsApp" və "Instagram" kimi məhsullara inteqrasiyasına başlandı.