Tim Kuk "Apple" rəhbəri kimi ən böyük səhvini açıqladı

"Apple" şirkətinin baş icraçı direktoru Tim Kuk bildirib ki, onun rəhbərlik dövründə ən böyük səhv 2012-ci ildə "Apple Maps" xidmətinin istifadəyə verilməsi olub.

Valyuta.az xəbər verir ki, bu barədə o, "Apple" əməkdaşları ilə keçirilən daxili görüşdə danışıb. Görüşdə onun potensial varisi Con Ternus da iştirak edib.

"Apple Maps" ilk təqdim olunduğu dövrdə ciddi problemlərlə üzləşmişdi: xəritələrdə yanlış marşrutlar, səhv küçə adları və qeyri-dəqiq məlumatlar istifadəçilərin narazılığına səbəb olmuşdu. Xidmət funksionallıq baxımından "Google Maps"dən geri qalırdı.

"Biz məhsulun hələ hazır olmadığını düşünmürdük, çünki əsasən lokal marşrutları test edirdik", deyə Tim Kuk bildirib.

Bu vəziyyət o qədər ciddi nəticələr doğurmuşdu ki, Kuk ictimai şəkildə istifadəçilərdən üzr istəmişdi. Eyni zamanda şirkət daxilində kadr dəyişiklikləri baş vermiş, proqram təminatı bölməsinin rəhbəri Skott Forstall vəzifədən uzaqlaşdırılmışdı.

Buna baxmayaraq, "Apple" sonrakı illərdə "Apple Maps"i ciddi şəkildə təkmilləşdirib və xidmət bu gün şirkətin ekosisteminin əsas hissələrindən biri sayılır.

Tim Kuk həmçinin digər uğursuz layihələrdən də danışıb. Onların arasında "AirPower" simsiz şarj platformasının ləğvi və "Apple"ın uzun illər ərzində inkişaf etdirməyə çalışdığı, lakin uğur qazana bilmədiyi pilotsuz avtomobil layihəsi də var.

Bununla belə, “Bloomberg” qeyd edir ki, bu uğursuzluqlar şirkəti ciddi böhrana salmayıb.

Kuk "Apple Watch"un və sağlamlıq funksiyalarının şirkət üçün ən böyük uğurlardan biri olduğunu xüsusilə vurğulayıb.

Yeni baş direktor vəzifəsinə keçəcək Con Ternus isə "Apple"ın yenidən “dünyanı dəyişməyə hazır olduğunu” bildirib. Dəyişikliklərin 1 sentyabrdan qüvvəyə minəcəyi qeyd olunur.

Şirkətin 2026-cı ildə yeni texnoloji yeniliklər – qatlanan "iPhone", ağıllı eynəklər və "Siri"nin böyük yenilənməsi üzərində işlədiyi də bildirilir.

Paşa Məmmədli