"Unilever" və "McCormick" 65 milyard dollarlıq qida nəhəngi yaradacaq

Amerikalı sous və ədviyyat istehsalçısı “McCormick” şirkəti “Unilever”in qida bölməsinin alınacağını açıqlayıb. Sövdələşmə çərçivəsində “Unilever Foods” 45 milyard dollar dəyərində qiymətləndirilib, birləşmiş strukturun ümumi dəyəri isə 65 milyard dolları keçib.

Valyuta.az xəbər verir ki, razılaşmanın şərtlərinə əsasən, “Unilever” səhmdarları yeni yaradılacaq şirkətin 55,1%-nə, “McCormick” səhmdarları 35%-nə, “Unilever” isə 9,9%-nə sahib olacaq. Gözlənilir ki, sövdələşmə 2027-ci ilin ortalarında tənzimləyici qurumların təsdiqindən sonra yekunlaşacaq.

Birləşmiş şirkətin beynəlxalq baş ofisi Niderlandda yerləşəcək. Qida bölməsinin satışından sonra “Unilever” 1930-cu ildə “Margarine Unie” (Niderland) və “Lever Brothers” (Böyük Britaniya) birləşməsi nəticəsində əldə etdiyi Niderland aktivlərini itirmiş olacaq. Bundan sonra şirkət dəriyə, üzə qulluq məhsulları və məişət kimyası istehsalına fokuslanacaq.

Xəbərə reaksiyada “Unilever” və “McCormick” səhmləri müvafiq olaraq 7% və 5% ucuzlaşıb. “Reuters”in məlumatına görə, investorlar sövdələşmənin mürəkkəb strukturundan, uzun icra müddətindən və mümkün antiinhisar araşdırmalarından narahatdırlar.

Paşa Məmmədli