Kafe və restoranlarda xərclənən vəsait 630 milyonu keçdi

2026-cı ilin yanvar-mart aylarında Azərbaycanda ictimai iaşə dövriyyəsi 630 milyon 46,1 min manat təşkil edib.

Valyuta.az xəbər verir ki, bu göstərici ötən ilin eyni dövrü ilə müqayisədə 68 milyon 766,1 min manat və ya 12,25% artım deməkdir. Belə ki, 2025-ci ilin ilk 3 ayında ictimai iaşə dövriyyəsi 561 milyon 280 min manat olub.

Hesabat dövründə ümumi dövriyyənin 4 milyon 817,1 min manatı dövlət mülkiyyəti, 625 milyon 229 min manatı isə qeyri-dövlət mülkiyyəti hesabına formalaşıb.

Dövlət mülkiyyəti üzrə dövriyyə illik müqayisədə 1 milyon 259,6 min manat və ya 20,72% azalıb. Ötən ilin eyni dövründə bu göstərici 6 milyon 76,7 min manat təşkil edib.

Qeyri-dövlət mülkiyyəti üzrə isə dövriyyə 70 milyon 25,7 min manat və ya 12,61% artaraq 625 milyon 229 min manata yüksəlib. 2025-ci ilin müvafiq dövründə bu rəqəm 555 milyon 203,3 min manat olub.

Statistikaya əsasən, cari ilin ilk 3 ayında özəl sektorda ictimai iaşə dövriyyəsinin 49,9%-i hüquqi şəxslərin, 50,1%-i isə bu sahədə sahibkarlıq fəaliyyəti ilə məşğul olan fiziki şəxslərin payına düşüb.

Hüquqi şəxslər üzrə dövriyyə isə ötən ilin eyni dövrü ilə müqayisədə 3,5% artaraq 312,2 milyon manat olub.

Sərvanə Rəmixanova