"Politco": Ağ Ev neftin 200 dollara qədər bahalaşmasını istisna etmir

ABŞ-ın Ağ Ev administrasiyası neftin qiymətinin barel üçün 200 dollara qədər yüksəlməsi ehtimalını istisna etmir. 

Valyuta.az xəbər verir ki, bu barədə "Politico" nəşri mənbələrə istinadən məlumat yayıb.

Məlumata görə, prezident Donald Tramp Maliyyə Nazirliyi və iri enerji şirkətlərindən qiymətlərin inkişafı ilə bağlı müxtəlif ssenarilər, o cümlədən ən mənfi variantlar barədə məlumat alıb.

Administrasiyanın qiymətləndirməsinə əsasən, barel üçün 100 dollar baza səviyyəsi hesab olunur, lakin bu rəqəmin iki dəfə artması ehtimalı da nəzərə alınır. Enerji sektorundan olan mənbələrdən biri mövcud vəziyyəti “tam səfərbərlik rejimi” kimi xarakterizə edib. Digər mənbə isə Ağ Evin enerji daşıyıcılarının qiymətini azaltmaq üçün bütün mümkün yolları axtardığını bildirib. Bununla belə, administrasiyanın rəsmi nümayəndəsi yaxın gələcək üçün hər hansı qiymət proqnozlarının verildiyini təkzib edib.

Neft bazarı üzrə analitik Rori Conston "Politico"ya açıqlamasında Yaxın Şərqdəki münaqişənin ABŞ-da yanacaq qiymətlərinə təsirini qiymətləndirməyin hələ tez olduğunu deyib. Ekspertin fikrincə, qiymət artımının “dalğası” amerikalı istehlakçılara ən tez iki həftədən sonra çatacaq.

Qlobal enerji bazarında kəskin qiymət artımı İranın Hörmüz boğazında gəmiçiliyi məhdudlaşdırmasından sonra baş verib. Bu marşrut Fars körfəzi ölkələrindən neft və qaz tədarükü üçün əsas yol hesab olunur. Mart ayının ortalarından etibarən "Brent" markalı neftin qiyməti barel üçün 100–110 dollar aralığında qalır.

Paşa Məmmədli