"TotalEnergies" Hörmüzün bağlanmasından sonra 1 milyard dollar qazanıb

“TotalEnergies” şirkətinin treyderləri may ayında yüklənməsi planlaşdırılan Birləşmiş Ərəb Əmirlikləri və Oman neftinin mövcud bütün partiyalarını alaraq təkcə mart ayında 1 milyard dollardan çox gəlir əldə ediblər. 

Valyuta.az xəbər verir ki, bu barədə “Financial Times” şirkətə yaxın mənbəyə istinadən məlumat yayıb.

Məlumata görə, ümumilikdə təxminən 70 neft partiyası alınıb ki, bu da bir ay əvvəlki göstəricidən iki dəfə çoxdur.

ABŞ və İsrailin İrana endirdiyi zərbələrdən sonra Tehran Hörmüz boğazı üzərindən hərəkəti məhdudlaşdırıb. Bu isə Murban və Oman markalı neftə tələbatı kəskin artıraraq qiymətlərin yüksəlməsinə səbəb olub. Eyni zamanda ticarət aktivliyi təxminən 50% artıb.

“TotalEnergies” şirkəti bu dövrdə alışları daha da gücləndirərək fyuçerslər, opsionlar və svoplar vasitəsilə əhəmiyyətli mənfəət əldə edib.

Şirkət nümayəndəsi “Financial Times”a bildirib ki, “TotalEnergies” ticarət fəaliyyəti ilə bağlı şərh vermir. Bundan əvvəl, martın 13-də şirkət Qətər, İraq və BƏƏ şelfində hasilatın müvəqqəti dayandırıldığını açıqlamışdı.

Paşa Məmmədli