19 yaşında təsadüfən biznes öyrəndi, ilk ildə milyon dollarlıq şirkətə rəhbərlik etdi - SƏHƏR OXUSU

ABŞ-da Kat Kole adlı sahibkarın karyera yolu təsadüfi qərarların və riskli seçimlərin uğura necə çevrilə biləcəyinin nümunəsi kimi diqqət çəkir.

Valyuta.az xəbər verir ki, o, 19 yaşında biznes idarəçiliyini təsadüfən öyrənməyə başlayıb və bu gün ilk ildə 600 milyon dollar gəlir əldə edən “AG1” şirkətinin baş icraçı direktoru vəzifəsinə qədər yüksəlib.

“AG1” (əvvəlki adı ilə “Athletic Greens”) ötən il 600 milyon dollar gəlir əldə edib. Kat Kole isə karyerasına sadə restoran işçisi kimi başlayıb. O, yeniyetmə yaşlarında “Hooters” restoranında hostes kimi işləyib, daha sonra ofisiant, barmen və hətta aşpaz kimi müxtəlif vəzifələri icra edib.

Kole bildirir ki, bu prosesdə o, fürsətləri dəyərləndirərək praktiki şəkildə biznes idarə etməyi öyrənib. 19 yaşında ona “Hooters” restoranlarının beynəlxalq açılışlarında iştirak etmək təklifi gəlib. Pasportu və uçuş təcrübəsi olmasa da, o bu təklifi qəbul edib və bu qərar onun karyerasında dönüş nöqtəsi olub.

Onun sözlərinə görə, bəzən “yox” demək daha böyük riskdir. Kole hesab edir ki, ideal zamanı gözləmək insanı yerində saymağa məcbur edir, halbuki qeyri-müəyyənlik inkişaf üçün imkan yaradır.

Karyerası boyunca o, “Cinnabon” şirkətinin prezidenti kimi fəaliyyət göstərərək iki il ərzində şirkətin gəlirliliyini üç dəfə artırıb. Daha sonra “AG1” şirkətinə qoşulan Kole burada mühüm strateji qərarlardan birinə imza atıb – şirkətin tam rebrendinqini həyata keçirib.

Şirkətin əvvəlki adı məhsulun imkanlarını tam əks etdirmədiyindən, rəhbərlik riskli, lakin vacib addım ataraq adı, vebsaytı və bütün rəqəmsal infrastrukturu dəyişib. Kole qeyd edir ki, “mükəmməl zaman” anlayışı əksər hallarda mövcud olmur və dəyişiklik üçün qərar vaxtında verilməlidir.

“AG1” əsasən gündəlik istifadə üçün nəzərdə tutulmuş kompleks qida əlavəsi təqdim edir. Şirkət bazarda öz yerini müəyyənləşdirərək bütün istifadəçilərə deyil, konkret auditoriyaya fokuslanıb. Məhsul xüsusilə sağlamlıq dəstəyi axtaran və keyfiyyətə önəm verən insanlar üçün nəzərdə tutulub.

Kole vurğulayır ki, müştərilər üçün əsas məsələ məhsulun effektivliyinə və keyfiyyətinə dair sübutların təqdim olunmasıdır. Bu səbəbdən şirkət klinik araşdırmalar, sertifikatlar və elmi sübutlara xüsusi önəm verir.

Nəticədə “AG1” şirkəti 2021-ci ildə 160 milyon dollar gəlirdən qısa müddətdə 600 milyon dollara qədər yüksəlib. Bu artım düzgün strategiya, riskə açıq yanaşma və müştəri ehtiyaclarının dəqiq müəyyənləşdirilməsi ilə əlaqələndirilir.

Kat Kole hesab edir ki, biznesdə uğurun əsas şərtlərindən biri yalnız ehtiras deyil, problemləri həll etmə bacarığıdır. Onun fikrincə, sahibkarlar davamlı şəkildə öyrənməyə və dəyişikliklərə açıq olmalıdırlar.

Tənzilə Ağabalayeva