Qızılda 18 ildən sonra bir ilk: Eniş davam edəcək?

ABŞ-İsrail-İran müharibəsinin qlobal təsirləri maliyyə bazarlarında kəskin dalğalanmalara səbəb olub. 

Valyuta.az xəbər verir ki, müharibənin ilk ayı geridə qalarkən, artan geosiyasi risklər enerji xərclərini yüksəldib və inflyasiya təzyiqlərini gücləndirib. Bu vəziyyət ABŞ Mərkəzi Bankının (FED) daha sərt monetar siyasət addımları atacağı ilə bağlı narahatlıqları artırıb.

Bu proses fonunda möhkəmlənən dollar, yüksələn istiqraz faizləri və likvidlik tələbatı qızılın qiymətinə ciddi təsir göstərib. Qızılın unsiya qiyməti mart ayında 11,3 faiz ucuzlaşaraq 2008-ci il qlobal maliyyə böhranından bəri ən kəskin aylıq enişini qeydə alıb.

Yaxın Şərqdə gərginliyin artması və qlobal inflyasiya risklərinin güclənməsi nəticəsində qızıl ötən ay eniş trendinə daxil olub. Mart ayında qiymət 4 099,52 dollar səviyyəsinə qədər geriləyərək 2025-ci ilin noyabrından bəri ən aşağı həddə düşüb.

Analitiklər bildirir ki, neft qiymətlərindəki artımın inflyasiyanı daha da sürətləndirəcəyi gözləntiləri istiqraz gəlirlərinin yüksəlməsinə səbəb olub. Eyni zamanda, FED-in bu il faiz endiriminə getməyəcəyi ehtimalları və investorların “təhlükəsiz liman” kimi dollara yönəlməsi qızılın ucuzlaşmasını sürətləndirib.

Digər tərəfdən, ABŞ və Avropada “Müqəddəs Cümə” tətili ilə əlaqədar bazarların bağlı olması ticarət həcmlərinin azalmasına gətirib çıxarıb. Bu səbəbdən neft qiymətlərində də nisbətən sabit dinamika müşahidə olunub.

Paşa Məmmədli