Baffetin favorit səhmləri: Uzunmüddətli investisiya üçün 3 şirkət

Məşhur investor və Warren Buffett uzun illər ərzində bazarı üstələyən gəlirləri ilə tanınıb. Onun rəhbərlik etdiyi Berkshire Hathaway son altı onillikdə orta hesabla illik təxminən 20% gəlir əldə edib ki, bu da bazarın əsas göstəricilərindən olan S&P 500 indeksinin eyni dövrdəki təxminən 10%-lik artımını xeyli üstələyib.

İnvestorların diqqətlə izlədiyi Baffet portfelində illərdir saxladığı bəzi şirkətlər var. “The Motley Fool” nəşrinin təhlilinə görə, bu şirkətlər uzunmüddətli investisiya üçün ən cəlbedici seçimlər sırasındadır.

Coca-Cola

Baffet ilk dəfə 1988-ci ildə Coca-Cola səhmlərini aldığını açıqlayarkən onları “çox uzun müddət” saxlamağı planlaşdırdığını bildirmişdi. Hazırda da şirkət Berkshire Hathaway portfelinin ən böyük investisiyalarından biri olaraq qalır.

Analitiklərin fikrincə, Coca-Cola-nın güclü brendi, geniş satış şəbəkəsi və ardıcıl dividend siyasəti onun əsas üstünlükləridir. Şirkət 50 ildən artıq müddətdə dividend ödənişlərini artıraraq investorlar üçün sabit gəlir mənbəyi yaradıb.

American Express

Baffetin ən böyük investisiyalarından biri də American Express şirkətidir. Hazırda bu səhm Berkshire Hathaway portfelində ikinci ən böyük paya malikdir.

Şirkət əsasən yüksək gəlirli müştərilərə xidmət göstərdiyi üçün iqtisadi dalğalanmalara qarşı daha dayanıqlı hesab olunur. Son dövrlərdə isə gənc müştərilər arasında populyarlığının artması gələcək inkişaf potensialını gücləndirir. Bundan əlavə, yüksək sərbəst pul axını şirkətə dividend ödənişlərini davam etdirmək imkanı yaradır.

Apple

Portfelin ən böyük mövqeyi isə Apple şirkətinə məxsusdur. Baffet Apple səhmlərini ilk dəfə 2016-cı ildə alıb və onları uzunmüddətli investisiya kimi saxlayır.

Texnologiya sektoruna nadir hallarda sərmayə qoyan investor Apple-ın güclü biznes modeli və bazardakı mövqeyini əsas üstünlüklər kimi qiymətləndirir. Şirkətin dünya üzrə 2,5 milyarddan çox aktiv cihaz bazası xidmət gəlirlərinin davamlı artmasına şərait yaradır. Rəqəmsal xidmətlər, bulud yaddaşı və əyləncə məhsulları Apple-a təkrarlanan gəlir axını təmin edir.

Mütəxəssislər hesab edirlər ki, güclü bazar mövqeyi, sabit maliyyə göstəriciləri və uzunmüddətli inkişaf potensialı Coca-Cola, American Express və Apple səhmlərini uzun illər ərzində portfeldə saxlamaq üçün uyğun seçimlərdən birinə çevirir.

Tənzilə Ağabalayeva

Seminar: "İnvestorlar hansı startaplara pul yatırmaq istəyir?"
"Traction Fund" Vençur Fondunun (ABŞ) təsisçisi və investisiya direktoru Ülvi Rəşidin Bakıdakı seminarına qoşulmaq istəyirsiniz? Əlavə məlumat üçün BURA BAXIN.