"Meta" mühəndislərə süni intellekt layihələrində seçim azadlığı verdi

"Meta" şirkəti mühəndislərin süni intellekt təlimi üzrə yaradılmış xüsusi işçi qrupuna məcburi şəkildə cəlb olunması ilə bağlı siyasətini yumşaldıb.

Valyuta.az xəbər verir ki, şirkət ötən ay gələcək süni intellekt modellərinin hazırlanmasına dəstək məqsədilə 7 min əməkdaşını, "Applied AI" işçi qrupuna və digər bölmələrə yenidən təyin etmişdi.

İndi isə "Meta" həmin qərara yenidən baxıb. Əməkdaşlara göndərilən daxili məktubda vurğulanıb ki, bundan sonra hər bir işçinin şəxsi seçiminə hörmət ediləcək və onların verəcəyi istənilən qərar dəstəklənəcək.

Sənəddə qeyd olunub ki, şirkət əməkdaşların komandada qalaraq ən qabaqcıl süni intellekt texnologiyalarının hazırlanmasında iştirak etməsini arzulasa da, yekun qərar hər kəsin öz ixtiyarında olacaq.

Bununla yanaşı, memorandumda bildirilib ki, sözügedən bölmədən ayrılmaq istəyən əməkdaşlara şirkətin digər bölmələrindəki vakansiyalar üzrə yerləşdirilmədə üstünlük veriləcək.

Qeyd edək ki, "Applied AI" işçi qrupu ötən ay əməkdaşlar arasında ciddi narazılıq yaratmışdı. Bəzi işçilər onlara həvalə olunan vəzifələri məlumatların etiketlənməsi (data labeling) işi ilə müqayisə edərək narazılıqlarını ifadə etmişdilər.

Şirkətin mövqeyini dəyişməsi texnologiya direktoru Endryu Bozvortun əməkdaşların motivasiya səviyyəsi ilə bağlı açıqlamalarından sonra baş verib. O, iyunun əvvəlində keçirilən daxili görüşlərin birində şirkətdəki mənəvi vəziyyətin "Meta"nın 20 illik tarixində bəlkə də ən aşağı səviyyəyə endiyini bildirib.

Xatırladaq ki, "Meta" may ayında işçi qüvvəsinin təxminən 10 faizini, yəni 8 minə yaxın əməkdaşını ixtisar etmişdi. Bu fonda şirkətin süni intellekt strategiyası və insan resursları siyasəti texnologiya sektorunda diqqətlə izlənilir.

Rəfiqə Abdin