Dövlət mənzil fonduna aid binalar təmir olunacaq - 49 milyonluq layihə

Bakı Şəhər Əsaslı Tikinti və Təmir MMC fevral ayında ümumi dəyəri 49 milyon 96 min 777 manat olan 2 tender elan edib.

Valyuta.az xəbər verir ki, elan edilən tenderlərdən biri Bakı şəhərinin Nərimanov, Səbail, Nizami, Binəqədi, Xəzər, Qaradağ və Pirallahı rayonları ərazisində dövlət mənzil fonduna aid binaların təmir işlərinin satın alınması ilə bağlıdır. Bu tender üzrə ehtimal olunan qiymət 23 milyon 986 min 64 manat təşkil edir. Sözügedən tender üçün müraciətlərin son tarixi 7 aprel olaraq müəyyən edilib.

İkinci tender isə Bakı şəhərinin Nəsimi, Yasamal, Xətai, Suraxanı və Sabunçu rayonları ərazisində dövlət mənzil fonduna aid binaların təmir işlərinin satın alınmasını əhatə edir. Bu tenderin ehtimal olunan dəyəri isə 25 milyon 110 min 711 manatdır. 

Müsabiqə 6 aprel tarixinədək davam edəcək.

Qeyd edək ki, nizamnamə kapitalı 100 manat olan Bakı Şəhər Əsaslı Tikinti və Təmir MMC-nin qanuni təmsilçisi Abit Əliyev Sadıq oğludur.

Sərvanə Rəmixanova