“Bəzən iş müsahibəsini aparan şəxslərin davranışları gərginliyi artırır”

Abid Səmədov
    İnsan Resursları üzrə ekspert

Hər gün onlarla namizəd müraciət etdikləri vakansiyalar üzrə və ya ümumi tanışlıq məqsədilə müxtəlif şirkətlər tərəfindən müsahibəyə dəvət olunur. Bu yazıda daha çox iş müsahibələrində ilk dəfə iştirak edən və ya təcrübəsi az olan namizədlərin qarşılaşdıqları çətinliklərdən danışmaq istəyirəm. Çünki bir çox hallarda namizəd şirkətin qapısından içəri daxil olan anda özünü sanki “Cinlər diyarına düşmüş Qərib” kimi hiss edir. Həddindən artıq həyəcan, tərləmə, titrəmə, fikri toparlaya bilməmək kimi hallar başlayır.
Bəzən bu gərginliyin artmasına müsahibəni aparan şəxslərin davranışları da səbəb olur. Amma əvvəlcə namizədlərin özlərinin nələrə diqqət etməli olduğuna baxaq.

Müsahibəyə gedərkən bunları mütləq edin:

Dəqiqləşdirin: Müsahibənin vaxtını, yerini və müsahibəni təyin edən şəxsin ad-soyadını əvvəlcədən öyrənin.

Vaxtında, hətta bir az tez olun: Ən azı 10 dəqiqə əvvəl orada olmağa çalışın. Gecikmə ehtimalı yaranarsa, mütləq əvvəlcədən məlumat verin. Gecikmək ilk təəssüratı mənfi edə bilər.

Hər kəslə nəzakətli olun: Təkcə müsahibə götürən şəxslə deyil, ofisdə qarşılaşdığınız digər əməkdaşlarla da salamlaşın və hörmətlə davranın. İlk rəy çox vaxt elə burada formalaşır.

Bədən dilinizə diqqət edin: Göz qaçırmaq, yerində narahat hərəkət etmək, titrəmək qarşı tərəfdə özünüzə güvənmədiyiniz və ya nəyisə gizlətdiyiniz təəssüratı yarada bilər.

Həyəcan jestlərini minimuma endirin: Barmaqlarla oynamaq, əlləri ovuşdurmaq, saça və üzə tez-tez toxunmaq, dodaq dişləmək kimi hərəkətlər həyəcan siqnallarıdır.

Gülümsəməyi unutmayın: Nə qədər həyəcanlı olsanız belə, səmimi gülümsəmə işə olan həvəsinizi və motivasiyanızı göstərir.

Sualı diqqətlə dinləyin: Müsahibədə heç bir sual təsadüfi verilmir. Hər biri namizədi müəyyən meyarlar üzrə qiymətləndirmək üçündür. Sual aydın deyilsə, təkrar və ya izah istəmək tamamilə normaldır.

Özünüzdə olmayan xüsusiyyətləri deməyin: Reallıqdan uzaq cavablar müsahibə zamanı və ya sonrakı mərhələlərdə mütləq üzə çıxır və bu, etibara zərər verir.

Məşq edin: Özünüzü gərgin hiss edirsinizsə, deyəcəklərinizi əvvəlcədən məşq edin. Bu, özünüzə inamı xeyli artırır.

Hər müsahibədən dərs çıxarın: Sizə verilən sualları və verdiyiniz cavabları qeyd edin. Növbəti müsahibələrdə çox zaman oxşar suallarla qarşılaşacaqsınız.

Siz də sual verin: Müsahibənin sonuna doğru şirkət, komanda və vəzifə ilə bağlı suallar vermək sizin maraqlı və düşünən namizəd olduğunuzu göstərir.

Bir neçə söz də “peşəkar” müsahibə aparanlara…

Bəzən elə mütəxəssislərlə qarşılaşırıq ki, namizəd otağa daxil olan kimi sanki onun “gözünün odunu almağa” çalışırlar.

Əziz mütəxəssislər, unutmayaq:

Namizəd sizin qonağınızdır. Onu mehriban və gülərüz qarşılayın. Rahatlaşması üçün sadə jestlər - səmimi münasibət, çay və ya su təklifi belə böyük fərq yaradır.

Qəribə və ya məqsədsiz suallarla namizədi çətin vəziyyətə salmaq peşəkarlıq göstəricisi deyil. Ola bilər ki, siz bəzi mövzularda ondan daha təcrübəlisiniz - bu artıq vəzifənizin tələbidir.

Müsahibənin sonunda isə sadəcə “Biz sizə məlumat verəcəyik” deyib mövzunu bağlamaq əvəzinə, ən qısa müddətdə real və aydın geribildirim vermək daha etik və peşəkar yanaşmadır.

Unutmayaq ki, namizədlərə münasibətimiz onların gözündə yalnız bizi deyil, təmsil etdiyimiz şirkəti də xarakterizə edir və bu, ictimai rəyin formalaşmasına birbaşa təsir göstərir.