"Google Play Store" 30%-lik komissiya modelini dəyişir

"Google" uzun müddətdir "Epic Games" ilə davam edən antinhisar mübahisəsindən sonra "Play Store"un iş modelində mühüm dəyişikliklərə başlayıb.

Valyuta.az xəbər verir ki, yeni qaydalara əsasən, "Play Store"un standart 30%-lik komissiya modeli dəyişdirilir. Artıq tərtibatçılar tətbiqdaxili ödənişlərdə "Google"un ödəniş sistemindən istifadə etməyə məcbur olmayacaq, öz ödəniş həllərini təqdim edə və ya istifadəçiləri birbaşa internet saytlarındakı ödəniş səhifəsinə yönləndirə biləcəklər.

"Google"un ödəniş sistemindən istifadə edənlər üçün isə ABŞ, Böyük Britaniya və Avropa İqtisadi Zonasında əlavə 5%-lik ödəniş emalı haqqı tətbiq olunacaq.

Bildirilir ki, yeni komissiya dərəcələri tərtibatçının illik gəlirindən asılı olacaq. İllik ilk 1 milyon dollar gəlir üçün xidmət haqqı 10%, bu həddi aşan gəlirlər üzrə isə birdəfəlik tətbiqdaxili alışlarda 20% təşkil edəcək. Abunəliklər üzrə komissiya isə 10% səviyyəsində qalacaq.

Yeni sistem 30 iyun 2026-cı ildən ABŞ, Böyük Britaniya və Avropa İqtisadi Zonasında qüvvəyə minəcək. Dünyanın digər ölkələrində isə dəyişikliklərin 30 sentyabr 2027-ci il tarixinədək mərhələli şəkildə tətbiqi planlaşdırılır.

"Google" həmçinin "Registered App Stores" proqramı çərçivəsində üçüncü tərəf "Android" tətbiq mağazalarının platformaya daha rahat inteqrasiyasına imkan yaradacağını da açıqlayıb.

Sərvanə Rəmixanova