Kriptovalyuta bazarı təzyiq altındadır

Kriptovalyuta bazarında satış dalğası dərinləşir.

Valyuta.az xəbər verir ki, "Bitcoin" psixoloji və texniki baxımdan mühüm hesab olunan 70 min dollar səviyyəsini itirdikdən sonra zəifləməni sürətləndirib. "Altcoin" bazarında isə itkilər daha sərt xarakter alıb.
Qlobal maliyyə bazarlarında artan riskdən qaçış tendensiyası kriptovalyutalara da təzyiq göstərir. Bu fonda “Bitcoin niyə düşür?”, “Altcoinlərdə eniş davam edəcəkmi?” sualları gündəmin əsas mövzularından birinə çevrilib.

Likvidlik bazarlardan çəkilir

Düşüşlərin ən mühüm və texniki səbəbi likvidlik tərəfi ilə bağlıdır. ABŞ Federal Ehtiyat Sisteminin (FED) Tərs Repo (RRP) imkanının demək olar ki, sıfırlanması ilə paralel olaraq ABŞ Xəzinəsinin Ümumi Hesabı (TGA) sürətlə yüksəlməyə başlayıb.

Bu vəziyyət bank sistemindəki ehtiyatların bazardan çıxarılaraq xəzinəyə yönəldiyini göstərir. Likvidliyin azalması isə birbaşa riskli aktivlərə zərbə vurur. Pul axınının zəifləməsi investorların manevr imkanlarını məhdudlaşdırır və “coinlər niyə düşür?” sualının əsas maliyyə cavabını formalaşdırır.

Qlobal riskdən qaçış və makro qeyri-müəyyənliklər

Satış təzyiqinin arxasında qlobal bazarlarda güclənən riskdən qaçış tendensiyası dayanır. ABŞ ilə İran arasında nüvə danışıqları ətrafında yaranan qeyri-müəyyənliklərin neft qiymətlərini yüksəltməsi, həmçinin "Alphabet" və "Qualcomm" kimi texnologiya nəhənglərindən gələn zəif maliyyə göstəriciləri investorları ehtiyatlı davranmağa vadar edir.
Ənənəvi bazarlarda texnologiya səhmlərindən çıxan institusional investorlar kriptovalyuta portfellərini də azaldaraq vəsaitlərini daha təhlükəsiz aktivlərə yönəldirlər.

Pərakəndə investor bazardan uzaq durur

Texniki mənzərə də bazar üçün mənfi siqnallar verir. Son bir həftədə kriptovalyuta bazarının ümumi dəyərindən təxminən yarım trilyon dollar silinib. Analitiklər bildirir ki, pərakəndə investorların risk iştahı hələlik bərpa olunmayıb.
"Bitcoin"in 70 min dollar səviyyəsindən aşağı enməsi fonunda növbəti güclü dəstək zonası kimi 65 min dollar aralığı ön plana çıxır. Bu qorxu, xüsusilə çətin mövqelərin sürətli şəkildə bağlanmasına səbəb olaraq satış dalğasını gücləndirir.

Sərvanə Rəmixanova