Mərkəzi Bank “Global İnnovations” və “United Payment”də pozuntular aşkarlayıb

Mərkəzi Bank “Global İnnovations” və “United Payment” MMC-lər ilə bağlı nəzarət tədbirləri həyata keçirib.

Valyuta.az xəbər verir ki, “Global İnnovations” tərəfindən “Ödəniş təşkilatları və elektron pul təşkilatları tərəfindən fəaliyyətin təşkili və həyata keçirilməsi Qaydası”nın 4.2-ci bəndi ilə müəyyən edilmiş məcmu kapitalın minimum miqdarına dair tələbin, eləcə də digər normativ tələblərin pozulması halları aşkarlanıb.

Bununla əlaqədar olaraq, “Ödəniş xidmətləri və ödəniş sistemləri haqqında” Azərbaycan Respublikasının Qanununun 63.1-ci maddəsinə əsasən şirkətə pozuntuların aradan qaldırılması məqsədilə icrası məcburi olan göstəriş verilib.

“United Payment” MMC-də isə aparılan yerində yoxlama zamanı aidiyyəti qanunvericilik və normativ aktların tələblərinin pozulması halları müəyyən edilib.

“Mərkəzi Bank haqqında” Azərbaycan Respublikasının Qanununun 48.2.4-cü və “Ödəniş xidmətləri və ödəniş sistemləri haqqında” Azərbaycan Respublikasının Qanununun 63.1-ci maddələrinə uyğun olaraq, cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə sahəsində aşkar edilmiş çatışmazlıqların aradan qaldırılması üçün şirkətə icrası məcburi göstərişlər verilib.