“PAŞA Bank”da səhmdar pay bölgüsünün dəyişməsi gözlənilir

"PAŞA Bank" ASC nizamnamə kapitalını artırmağa hazırlaşır. Kapital artımının həyata keçirilməsi bankın səhmdar strukturunda dəyişikliklərə səbəb ola bilər.

Valyuta.az xəbər verir ki, nizamnamə kapitalı 18,659 milyon manat artırılaraq 354,512 milyon manatdan 373,171 milyon manata çatdırılacaq.

Bu artım çərçivəsində hər birinin nominal dəyəri 20 manat olan 932 926 ədəd yeni səhmin emissiyası nəzərdə tutulur. Səhmlərin fiziki şəxslərə satılması planlaşdırılır.

Yerləşdirmə tam baş tutacağı təqdirdə, fərdi investorlar bankın səhmlərinin təxminən 5%-nə sahib olacaqlar. Bu isə mövcud səhmdarların pay bölgüsündə nisbətən azalma ilə nəticələnəcək.

Belə ki, hazırda səhmlərin 56,82%-nə nəzarət edən PAŞA Holdinq MMC-nin payı 53,98%-ə enə bilər. Eyni zamanda, 28,18%-lik paya malik olan Bless MMC-nin payının 26,77%-ə düşəcəyi gözlənilir. Bankın səhmlərinin 9,99%-nə sahib olan Arif Paşayevin payı 9,49%-ə, 5,01%-lik paya sahib Mircamal Paşayevin payı isə 4,76%-ə qədər azalacaq.