Texnologiyanın xəyalları: "Apple"ın heç vaxt istehsal etmədiyi 7 gizli layihəsi

"Apple" texnologiya dünyasında yalnız bazara çıxardığı məhsullarla deyil, həm də hazırlayıb təqdim etmədiyi “xəyal” layihələri ilə tanınan bir nəhəngdir. 

Valyuta.az xəbər verir ki, şirkətin 50 illiyi münasibətilə hazırlanan bu icmal, qapalı qapılar arxasında illərlə üzərində işlənmiş, lakin müxtəlif səbəblərlə dayandırılmış yeddi məşhur layihəni üzə çıxarır.

1. "Apple Car" (2014–2024)

"Project Titan" kod adı ilə on il ərzində inkişaf etdirilən elektrikli avtomobil layihəsi "Apple" tarixinin ən bahalı “imtinalarından” biri hesab olunur. Dizaynı dəfələrlə dəyişdirilən avtomobil bəzən sükan olmayan futuristik kapsul, bəzən isə miniven kimi təsəvvür edilirdi. Şirkət sonda diqqətini süni intellektə yönəldərək avtomobil istehsalı ideyasından tamamilə imtina edib.

2. "Big Mac" (1984)

Adına görə "McDonald’s" ilə hüquqi mübahisə riski yaradan bu kompüter ilk "Macintosh"dan daha güclü, şaquli ekranlı peşəkar iş stansiyası kimi nəzərdə tutulmuşdu. Stiv Cobsun şirkətdən ayrılmasından sonra layihə “Dead Mac” kimi anılmağa başladı və yerini daha ənənəvi dizayna malik "Macintosh II"yə verib.

3. "Apple Ring" (2013-dən bu günə)

"Apple Watch"un barmaq ölçülü versiyası kimi düşünülən bu ağıllı üzük illərdir patent sənədlərində qalır. Sağlamlıq izləmə və digər "Apple" cihazlarını jestlərlə idarə etmək üçün nəzərdə tutulan layihə, "Apple Watch"un uğuru səbəbindən hər dəfə geri plana keçirilib. Lakin 2026-cı ilə aid son sızmalar bu məhsulun sentyabr ayında təqdim oluna biləcəyini göstərir.

4. "Apple TV" (tam inteqrasiya olunmuş televiziya)

"Apple"ın yalnız xarici qurğu deyil, birbaşa 4K keyfiyyətli televiziya paneli istehsal edəcəyi iddiası illərlə müzakirə olunub. Stiv Cobsun “mükəmməl interfeys tapdıq” dediyi bildirilsə də, yüksək istehsal xərcləri və istifadəçilərin televizoru nadir hallarda yeniləməsi şirkətin bu ideyadan geri çəkilməsinə səbəb olub.

5. "PowerBook G5" (2005)

Masaüstü performansını noutbuka gətirmək məqsədi daşıyan bu layihə "PowerPC G5" prosessorunun həddindən artıq qızması səbəbilə uğursuz olub. Prosessoru soyutmaq üçün tələb olunan iri ventilyatorların cihazı səs-küylü və qeyri-praktik edəcəyi məlum olduqdan sonra "Apple" bu istiqamətdən imtina etdi və sonradan "Intel" prosessorlarına keçidin yolu açılıb.

6. Kameralı "Apple Watch" (2016–2025)

Şirkət uzun müddət saatın qayışına və ya korpusuna kamera yerləşdirməyi araşdırıb. Videozəng və obyekt tanıma kimi funksiyalar planlaşdırılsa da, məxfilik narahatlıqları və yüksək enerji istehlakı bu ideyanın reallaşmasına mane olub.

7. "Apple Paladin" (1990-cı illərin ortaları)

Stiv Cobsun şirkətdə olmadığı dövrdə hazırlanan bu cihaz kompüter, faks aparatı, skaner və telefonu birləşdirən kompleks bir ofis qurğusu idi. "Project X" kod adı ilə inkişaf etdirilən bu layihə texnoloji baxımdan ağır və qeyri-effektiv olduğu, həmçinin internet dövrünün başlanması səbəbilə kütləvi istehsala keçmədən dayandırılıb.

Paşa Məmmədli