Ultra-zənginlərin seçimi: 2025-ci ildə alınan bahalı 5 lüks daşınmaz əmlak bazarı

2025-ci ilin sonunda maliyyə bazarları qlobal qeyri-sabitlik fonunda dalğalanarkən, yüksək sərvətə sahib investorlar gözlərini daşınmaz əmlaka yönəldiblər. Aspen, Nyu-York və Mayami kimi şəhərlərdə səkkizrəqəmli qiymətlərlə lüks mülklər sürətlə əldən çıxır.

Valyuta.az aşağıda ultra-zənginlərin aktiv şəkildə alqı-satqı etdiyi beş əsas bazar təqdim edir:

1. Manhattan, Nyu-York

Corcoran agentliyinin Inhabit bloquna görə, Manhattanda 4 milyon dollardan yuxarı olan mülklərlə bağlanan müqavilələrin sayı son 10 ilin ortalamasını keçib. Pandemiyadan sonra orta qiymət 1.23 milyon dollara çatıb ki, bu da illik 7% artım deməkdir. Hər kvadrat fut üçün orta qiymət isə 1,792 dollara yüksəlib — bu da son 10 ilin göstəricisinə bərabərdir. Bu artım lüks segmentdə aktivliyin və kondominium satışlarının payının artması ilə əlaqələndirilir. Eyni zamanda, premium məkanlarda təklifin məhdud olması da qiymətləri artırır. Dekabr ayı isə bazarda nisbi durğunluq səbəbilə alıcılar üçün fürsət dövrü hesab edilir.

Məsələn, iş adamı Dan Herbatschek ilin əvvəlində, mart-may aylarında, iqtisadi qeyri-müəyyənliklərə baxmayaraq, dörd kondominiuma dair müqavilə imzaladığını “Wall Street Journal”a bildirib.

2. Mayami, Florida

UBS-in yayımladığı Qlobal Daşınmaz Əmlak Balon İndeksi Mayamini siyahının başında yerləşdirib. Şəhərin balon riski göstəricisi 1.73-dür, bu da kritik hədd olan 1.5-dən çoxdur. Bu risk səviyyəsi qorxuducu görünsə də, bu fakt varlı alıcıları bazardan uzaqlaşdırmayıb.

Mayami bir çoxları üçün həm investisiya fürsəti, həm də vergidən azad mühitin verdiyi cazibədir. Şəhər hələ də ultra-zənginlərin diqqət mərkəzindədir.

3. Los Anceles, Kaliforniya

“Ən bahalı şəhərlər” sırasında olan Los Ancelesdə hazırda qiymət azalması müşahidə olunur. 2025-ci ilin sonunda burada orta satış qiyməti 1 milyon dollara düşüb ki, bu da qiymətlərin enməkdə olduğunu və 2026-cı il üçün alqı-satqının artacağını göstərir.

Bu dəyişiklik, lüks villalardan tutmuş klassik bungalovlara qədər müxtəlif mülklərin alqı-satqısında imkanlar yaradır. Alıcılar, xüsusilə də yüksək sərvətə malik olanlar, bu fürsəti qaçırmır.

4. Aspen, Kolorado

Aspen, sözün əsl mənasında, milyarderlərin oyun meydançasıdır. Sərt zonalama qaydaları və məhdud tikinti sahəsi burada mülkləri həm nadir, həm də qiymətli edir. Dünyaca məşhur xizək mərkəzi və sakit lüks atmosferi ultra-zəngin alıcılar üçün buranı cazibədar edir. Burada sərvət nümayiş olunmur, əksinə, gizlilik və eksklüzivlik əsasdır. Əmlak qiymətləri isə sabit şəkildə yüksəlir.

5. Palm Beach, Florida

Palm Beach County, ABŞ-da ən güclü lüks daşınmaz əmlak bazarlarından birinə çevrilib. Əyalətdə gəlir vergisinin olmaması da yüksək gəlirli alıcıların bu bölgəyə yönəlməsinin əsas səbəblərindən biridir. Burada "Milyarderlər Sırası" (Billionaire’s Row) kimi tanınan mülklərin qiymətləri yalnız ultra-zənginlər üçün əlçatandır. Hazırda Palm Beach-də orta ev qiyməti təxminən 2.8 milyon dollardır.

Ultra-zənginlər niyə indi alır?

Əmlak üzrə mütəxəssis Jessica Robinson-a görə, “Bazar qeyri-sabit görünəndə, zənginlər pullarını park etmir — onları hərəkətə gətirir, əsasən də Aspen, Mayami və Nyu-York kimi 'miras bazarlara' yönəldirlər.”

O bildirir ki, daşınmaz əmlak bazarı fond bazarına nisbətən daha az dəyişkəndir və zənginlərə real, toxunula bilən sərvət təqdim edir: “Onlar yalnız ev yox, dəyərini qoruyan bir aktiv axtarırlar.”

Eli Pasternak, Florida üzrə daşınmaz əmlak agenti və investor, bu davranışı daha çox “panik alış” adlandırır. “Silicon Valley Bank-ın dağılmasından sonra bir müştərim 18 milyon dolları bankdan çıxarıb və dərhal Mayamidə üç lüks kondominium aldı.”

Maliyyə strategiyası, yoxsa riskli addım?

Bu strategiyanın həm üstünlükləri, həm də çatışmazlıqları var. Pasternak deyir: “Premium əmlak bazarlarında qiymətlər asanlıqla çökmür. Bu, sıravi əmlak bazarından fərqlidir.”

Robinson isə əlavə edir: “Bu səviyyədə oynayanlar üçün bu addım spekulyasiyadan çox, sərvətin qorunması üçündür.”

Ancaq bəzi alıcılar bazar dəyərindən 2–3 milyon dollar artıq ödəyirlər ki, bu da emosional alışın baha başa gəldiyini göstərir. Pasternak deyir: “Mən həmişə müştərilərimə deyirəm ki, emosional alqı çox vaxt ağıllı investisiyadan baha olur. Amma onların kifayət qədər vəsaiti var ki, bu fərqi qarşılaya bilsinlər.”

Tənzilə Ağabalayeva