Eskişehirin Odunpazarı rayonunda yaşayan Eylül Gökbiçer 18 yaşında öz biznesini quraraq diqqət çəkib. O, yaşıdları sosial mediada vaxt keçirərkən gələcəyini formalaşdırmağı seçib və qısa müddətdə sahibkarlıq fəaliyyətinə başlayıb.
Valyuta.az xəbər verir ki, Eylül Gökbiçer 15 yaşından etibarən işləməyə başlayaraq vəsait toplamağa başlayıb.
Liseyi qiyabi formada başa vuran gənc təşəbbüskar topladığı təxminən 350 min TL vəsaitlə bir il əvvəl Odunpazarı rayonunun Arifiye məhəlləsi, Bilir küçəsində uzun müddətdir arzuladığı kafenin açılışını edib.
O bildirib ki, biznesini qurarkən nə ailəsindən, nə də başqa bir mənbədən maddi dəstək alıb. Bütün vəsaiti şəxsi zəhməti ilə topladığını vurğulayan Gökbiçer sahibkarlığa erkən yaşda başlamağın məsuliyyət tələb etdiyini qeyd edib.
Sosial şəbəkələrdən istifadə etmədiyini deyən gənc sahibkar boş vaxtlarını kitab oxumaqla dəyərləndirdiyini bildirib. Onun sözlərinə görə, ticarət cəsarət tələb edir, lakin nəticəsi müsbət olur. Gələcək planları arasında brendini genişləndirmək və yeni filiallar açmaq yer alır.
Mayya Hüseynova
