Adi mətbəx süngəri ilə başlayan startap milyonluq biznesə çevrildi

Bəzən ən böyük biznes ideyaları mürəkkəb texnologiyadan deyil, gündəlik həyatda rast gəlinən sadə problemlərdən yaranır. “Scrub Daddy” bunun ən uğurlu nümunələrindən biridir. Adi bir süngər kimi görünən məhsul sonradan “Shark Tank” tarixinin ən məşhur uğur hekayələrindən birinə çevrildi. 

Valyuta.az xəbər verir ki, Aaron Krause əvvəllər avtomobil təmizliyi və cilalama məhsulları sahəsində çalışırdı. O, əvvəlki biznesini 2008-ci ildə “3M” şirkətinə satmışdı. Lakin hazırladığı süngər məhsulu həmin razılaşmaya daxil edilmədi və bir müddət kənarda qaldı.

Bir neçə il sonra Krause həmin məhsulu yenidən sınaqdan keçirdi və onun mətbəxdə istifadə üçün daha uyğun olduğunu anladı. Məhsulun əsas fərqi materialında idi: süngər soyuq suda sərtləşir, isti suda isə yumşalırdı. Bu xüsusiyyət onu həm zərif səthlər, həm də çətin ləkələr üçün uyğun edirdi. 

2012-ci ildə Aaron Krause “Shark Tank” verilişinə qatıldı. O, şirkətin 10%-i qarşılığında 100 min dollar investisiya istəyirdi. Verilişdə investorlar arasında maraqlı rəqabət yarandı və sonda Lori Greiner ilə 200 min dollar qarşılığında 20% pay razılaşması əldə olundu. 

Bu çıxış şirkət üçün dönüş nöqtəsi oldu. Verilişdən sonra məhsul sürətlə populyarlaşdı, televiziya satış platformalarında və iri mağaza şəbəkələrində yer aldı. Sonrakı illərdə “Scrub Daddy” yüz milyonlarla dollar gəlir əldə edən qlobal brendə çevrildi. 2024-cü il məlumatlarına görə, şirkətin illik gəliri 220 milyon dolları ötüb. 

“Scrub Daddy” hekayəsi göstərir ki, uğurlu biznes üçün hər zaman mürəkkəb ideya lazım deyil. Bəzən gündəlik istifadə olunan ən sadə məhsul düzgün təqdimat və doğru strategiya ilə dünya bazarına çıxa bilir.

Mayya Hüseynova