Kiloqramı 28 manat: Azərbaycanın ən bahalı mavi pendir idxalı bu ölkədəndir

Azərbaycan cari ilin ilk iki ayında 4 ölkədən mavi və digər pendirlər idxal edib.

Valyuta.az xəbər verir ki, hesabat dövründə bu ölkələrdən ümumilikdə 0,21 ton həcmində, 2,79 min ABŞ dolları dəyərində mavi pendir idxal olunub.

İdxal olunan məhsulların mənbə ölkələri sırasında Belarus, Almaniya, Fransa və İtaliya yer alıb.

Ən yüksək qiymətli idxal Belarusdan qeydə alınıb. Belə ki, bu ölkədən 0,06 ton həcmində, 0,99 min ABŞ dolları dəyərində məhsul gətirilib. Hesablamaya görə, 1 kiloqramın orta qiyməti 16,5 dollar və ya 28,05 manat təşkil edib.

Almaniyadan 0,01 ton həcmində, 0,13 min ABŞ dolları dəyərində pendir idxal olunub. Bu isə 1 kiloqram üçün orta hesabla 13 dollar və ya 22,1 manat deməkdir.

Fransadan 0,06 ton həcmində, 0,69 min ABŞ dolları dəyərində məhsul gətirilib. 1 kiloqramın orta qiyməti 11,5 dollar və ya 19,55 manat olub.

İtaliyadan isə 0,08 ton həcmində, 0,98 min ABŞ dolları dəyərində idxal həyata keçirilib. Bu ölkədən gətirilən məhsulun 1 kiloqramının orta qiyməti 12,25 dollar və ya 20,82 manat təşkil edib.

Sərvanə Rəmixanova