Al agentləri bazara daxil oldu: Öz aralarında real pul mübadiləsi aparırlar

“Anthropic” şirkətinin apardığı təcrübədə süni intellekt (Al) agentləri real məhsullar üzərində qarşılıqlı alış-veriş və danışıqlar aparıb. Nəticələr göstərib ki, daha güclü modellər daha uğurlu razılaşmalar əldə edir.

Valyuta.az xəbər verir ki, “Anthropic” bu eksperimentə “Project Deal” adını verib. Şirkət bunun kiçik miqyaslı pilot sınaq olduğunu bildirib. Təcrübədə 69 əməkdaş iştirak edib. Hər bir iştirakçıya 100 dollarlıq hədiyyə kartı verilib və onlar bu büdcə ilə bir-birlərindən məhsullar alıblar.

Qısa müddətdə yüzlərlə razılaşma

Təcrübə gözləniləndən daha sürətli nəticə verib. Cəmi 186 razılaşma bağlanıb və əməliyyatların ümumi dəyəri 4 min dolları keçib. Şirkət sistemin praktik istifadədə problemsiz işlədiyini və nəticələrin diqqətçəkici olduğunu vurğulayıb.

Dörd fərqli bazar modeli

“Anthropic” yalnız bir ssenari ilə kifayətlənməyib və dörd fərqli bazar modeli yaradıb. Bunlardan biri real şərtlərə uyğunlaşdırılmış model olub. Bu ssenaridə ən inkişaf etmiş süni intellekt istifadə edilib və nəticədə bağlanan razılaşmalar real icra olunub. Digər üç model isə müqayisə məqsədi daşıyıb.

Daha güclü model daha yaxşı nəticə verdi

Nəticələr açıq fərq ortaya qoyub: daha inkişaf etmiş süni intellektlə təmsil olunan istifadəçilər daha sərfəli sövdələşmələr əldə ediblər. Lakin maraqlı məqam odur ki, istifadəçilər bu fərqi çox vaxt hiss etməyiblər.

Bu isə sistemdə “agent keyfiyyəti fərqi” yarana biləcəyini göstərir. Yəni bəzi istifadəçilər daha zəif mövqedə olsa da, bunun fərqinə varmadan qərarlar qəbul edə bilərlər.

Təlimatların təsiri məhdud qaldı

Təcrübədə verilən ilkin təlimatlar qiymətlərə və razılaşma ehtimalına ciddi təsir göstərməyib. Nəticələr daha çox istifadə edilən modelin gücündən asılı olub, danışıqların nəticəsini əsasən süni intellektin qabiliyyəti müəyyən edib.

Paşa Məmmədli