“İşçinin öz biznesini qurması rəhbərlik üçün təhdid deyil”

Bahar Dadaşova
Strateq, Mentor və Biznes idarəetməsi üzrə ekspert

Çox vaxt deyilir ki, insan yeni işə başlayırsa, bütün enerjisini və diqqətini yalnız ora yönəltməlidir. Amma reallıqda bir çox insan maliyyə sabitliyini qorumaq üçün əsas işini saxlayaraq biznes qurmağa çalışır. 

Biznesə başlayanda işi saxlamaq doğrudurmu və rəhbər buna görə işçini işdən çıxara bilərmi?

Yeni biznes və mövcud karyera balansı: strateji və etik yanaşma

Yeni işə başlayarkən “bütün körpüləri yandırmaq” yanaşması çox vaxt romantikləşdirilir. Lakin reallıq daha soyuqqanlı və strateji planlama tələb edir. Bu məsələ ilə bağlı əsas tezislərim bunlardır:

“Hesablanmış risk” modeli

Biznesin ilk mərhələlərində gəlir qeyri-müəyyən olur. Əgər sahibkarın arxasında onu ən azı 6-12 ay təmin edəcək maliyyə yastığı yoxdursa, o, strateji deyil, “sağ qalmaq” instinkti ilə tələsik qərarlar verir. Mövcud işi müəyyən müddət saxlamaq yeni biznesin düzgün formalaşması üçün lazım olan maliyyə və psixoloji rahatlığı təmin edir. Mən həmişə “keçid strategiyası”nın tərəfdarıyam: nə zaman ki, yeni işin gətirdiyi gəlir və ya tələb etdiyi zaman əsas işi üstələməyə başlayır, məhz o zaman bütün diqqəti həmin istiqamətə yönəltmək peşəkar addımdır.

Rəhbər və işçi münasibətləri: etika və performans

İşçinin öz biznesini qurması rəhbərlik üçün təhdid deyil. Əksinə, bu, onun daxili motivasiyasının və sahibkarlıq ruhunun (ownership mindset) göstəricisidir. Lakin burada iki “qırmızı xətt” var:

Maraqların toqquşması: Əgər biznes mövcud şirkətin resurslarından  müştəri bazası, konfidensial məlumatlar və digər imkanlardan - istifadə edirsə, bu, hüquqi və etik pozuntudur.

Performansın aşağı düşməsi: İşçi öz layihəsinə görə əsas öhdəliklərini yerinə yetirmirsə, bu, müqaviləyə xitam verilməsi üçün əsas sayıla bilər.

Tövsiyəm dürüstlükdür. Əgər qurduğunuz iş mövcud şirkətə rəqib deyilsə, bunu rəhbərliklə şəffaf şəkildə bölüşmək olar. Müasir rəhbərlər işçisinin inkişafına mane olmur, əksinə, onun enerjisindən şirkətdaxili yeni layihələrdə yararlanmağa çalışırlar. Öz gələcəyinizi qurarkən peşəkar imicinizi zədələməyin.