Azərbaycanda ilk dəfə “World Robot Caspian Cup” yarışı keçiriləcək

Rəhman Rəsulzadə: Yarış “Made in Azerbaijan” brendi altında yeni texnoloji məhsulların formalaşmasına imkan yaradacaq

Azərbaycanda ilk dəfə olaraq bu il iyunun 26-dan 28-dək “World Robot Caspian Cup” adlı beynəlxalq robototexnika yarışı keçiriləcək.

Bunu “AREA Group of Companies”in rəhbəri, Azərbaycan Robototexnika Mühəndislik Akademiyasının (AREA) təsisçisi Rəhman Rəsulzadə deyib.

Rəhman Rəsulzadə bildirib ki, AREA artıq 10 ildir ölkəmizdə mühəndislik və robototexnika sahəsində fəaliyyət göstərir və əsas məqsəd gənclərin nəzəri biliklərlə yanaşı, praktiki bacarıqlarını artırmaqdır.

“Gənclərlə, tələbələrlə və məktəblilərlə çalışırıq. Robototexnika, mühəndislik, süni intellekt və dron texnologiyaları üzrə bilik və bacarıqların inkişafına yönəlmiş layihələr həyata keçiririk. Məqsəd ölkədə texnoloji ekosistemin gücləndirilməsidir. Bütün gəncləri və bu sahədə maraqlı olanları “World Robot Caspian Cup”da iştirak etməyə dəvət edirik”, - deyə o bildirib.

AREA-nın təsisçisi qeyd edib ki, keçiriləcək yarış gənclərin öz ideyalarını, prototiplərini və layihələrini təqdim etməsi üçün platforma rolunu oynayacaq və “Made in Azerbaijan” brendi altında yeni texnoloji məhsulların formalaşmasına imkan yaradacaq.

© Azərtac