Azərbaycanın MDB ölkələri ilə ticarətdə əsas tərəfdaşları - ÖLKƏLƏR

Bu ilin yanvar-mart aylarında Azərbaycanın MDB ölkələri ilə ticarət dövriyyəsi 1 milyard 204 milyon 895 min ABŞ dolları təşkil edib.   

Valyuta.az Dövlət Gömrük Komitəsinə istinadən xəbər verir ki, bu müddətdə MDB ölkələrinə ixracın həcmi 389 milyon 357 min ABŞ dolları olub ki, bu da ümumi ixracın 7.21%-ni təşkil edir.  

Müqayisə üçün ötən ilin eyni dövründə bu göstərici 353 milyon 449 min ABŞ dolları (ümumi ixracın 5.53%-i) idi. Beləliklə, illik müqayisədə MDB ölkələrinə ixrac 35 milyon 908 min ABŞ dolları artıb.  

İdxala gəlincə, cari ilin yanvar-mart aylarında MDB ölkələrindən idxalın həcmi 815 milyon 537 min ABŞ dolları olub. Bu, ümumi idxalın 20.36%-nə bərabərdir. Ötən ilin eyni dövründə isə bu göstərici 1 milyard 601 milyon 948 min ABŞ dolları (ümumi idxalın 28.29%-i) olub. İllik idxal dəyərində MDB ölkələri üzrə 786 milyon 410 min ABŞ dolları həcmində azalma qeydə alınıb. 

Mayya Hüseynova