Həyat yoldaşı ilə ortaq biznes qurdu, “İlin iş adam”ı seçildilər - MÜSAHİBƏ

561 balla Azərbaycan Dövlət Neft və Sənaye Universitetinin biznesin idarə olunması ixtisasına qəbul olur. 2 il sonra universiteti yarımçıq qoyub, anasından qalma evi satıb Almaniyada təhsil almaq qərarı verir və bu ölkədə də idarəetmə üzrə oxuyur.

Təhsilini başa vurandan sonra qısa müddət Azərbaycanda çalışır və ardınca magistr təhsili üçün İngiltərəyə üz tutur.

Ölkəyə qayıtdıqdan sonra müxtəlif sahələrdə idarəetmə üzrə çalışır. Bir gün isə qərar verir ki, Azərbaycanda hələ də yetişdirilməyən mavigilə meyvəsinin bu torpaqda da istehsalına başlasınlar. Bu biznes üçün ortaq olaraq həyat yoldaşını seçir və birlikdə 2 il davam edən bir araşdırma aparırlar. Niderland, Çili, İspaniya, İtaliya kimi ölkələrə gedib onların təcrübələrini öyrənirlər və sonra işə başlayırlar. İlk cəhdlərində itkiləri çox olsa da, nəhayət mavigilənin Azərbaycanda yetişdirilməsinə nail olurlar.

Söhbət “EY” tərəfindən Azərbaycanda keçirilən “İlin iş adamı” müsabiqəsinin qalibləri, “Berry Blues By We Grow” biznesinin sahibləri İlyas Əhmədov və xanımı Mehri Əhmədovadan gedir.

Valyuta.az-ın qonağı olan İlyas Əhmədov bu biznesin qurulmasında keçdikləri yoldan danışdı.