KOBİA sədri: "Biznes dünyası tarixin ən sürətli dəyişiklik dövrlərindən birini yaşayır" 

"Süni intellekt, rəqəmsallaşma və avtomatlaşdırma əmək bazarında yeni tələblər formalaşdırır".

Valyuta.az xəbər verir ki, bunu Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov Bakıda keçirilən Biznes Liderləri Zirvəsində çıxışı zamanı deyib.

KOBİA sədri bildirib ki, biznes dünyası tarixin ən sürətli dəyişiklik dövrlərindən birini yaşayır: "Rəqəmsal transformasiya, süni intellekt texnologiyalarının sürətli inkişafı, qlobal iqtisadi qeyri-müəyyənliklər və iqlim dəyişiklikləri biznes fəaliyyət prinsiplərini yenidən formalaşdırır. Belə bir şəraitdə liderlik, innovasiya və strateji düşüncə hər zamankindən daha böyük əhəmiyyət daşıyır".

O.Məmmədov qeyd edib ki, şirkətlər artıq yalnız məhsul və xidmətlə deyil, texnologiya və məlumatların idarə olunması sahəsində də rəqabət aparırlar:

"Kiçik və orta biznesin bu transformasiyaya uyğunlaşması üçün yeni biliklərə, bacarıqlara və texnoloji həllərə böyük ehtiyac var".

KOBİA sədri vurğulayıb ki, əmək bazarında baş verən dəyişikliklər yeni peşələrin yaranmasına və mövcud peşələrin transformasiyasına səbəb olur:

"Bu gün işəgötürənlər yalnız peşə biliklərinə malik əməkdaşlar deyil, eyni zamanda dəyişikliklərə sürətlə uyğunlaşa bilən, analitik düşünən və davamlı öyrənməyə çalışan mütəxəssislər axtarırlar".

O.Məmmədovun sözlərinə görə, Azərbaycanın əlverişli coğrafi mövqeyi və regional nəqliyyat layihələrində artan rolu sahibkarlar üçün yeni imkanlar açır: "Bu imkanlardan səmərəli istifadə etmək üçün biznes subyektlərinin daha çevik, innovativ və dayanıqlı idarəetmə modellərini tətbiq etməsi xüsusi əhəmiyyət daşıyır".

KOBİA sədri həmçinin yaşıl iqtisadiyyatın və ESG prinsiplərinin biznes üçün vacibliyinə diqqət çəkib: "Yaşıl texnologiyalara investisiya, resurslardan səmərəli istifadə və ekoloji məsuliyyətli biznes modellərinin tətbiqi gələcək dövrdə müəssisələrin rəqabət qabiliyyətini artıran mühüm amillərdən olacaq".

Rəfiqə Abdin