Ləğv prosesində olan bankların avtomobilləri 1 500 manatdan satışa çıxarılır

4 mart tarixində “Bakı Hərrac Mərkəzi”ndə Əmanətlərin Sığortalanması Fondunun ləğvetməsində olan bir sıra bankların balansında olan daşınmaz əmlaklar açıq hərraca çıxarılacaq.

Valyuta.az xəbər verir ki, ləğvetmədə olan “Atabank” ASC-yə məxsus daşınmaz əmlak Şirvan şəhəri, Heydər Əliyev prospektində, icarədə olan 0,55 hektar torpaq sahəsində yerləşir.

Əmlak 6A nömrəli, 2 girişli, ümumi sahəsi 314,7 kvadratmetr (275,7 kvadratmetr əsas, 39 kvadratmetr köməkçi sahə) olan 2 mərtəbəli qeyri-yaşayış binasından ibarətdir. İlkin satış qiyməti 430 000 manat müəyyən edilib. 

Həmin tarixdə “NBCBank” ASC-nin balansında olan daşınmaz əmlaklar da 1 lot üzrə açıq hərraca çıxarılacaq. Lot Bakı şəhəri, Azadlıq prospekti 81 ünvanında yerləşən ümumi sahəsi 263,0 kvadratmetr və 281,2 kvadratmetr olan iki qeyri-yaşayış sahəsidir. Birincisinin İikin satış qiyməti 500 000 manat, digərinin isə 2 300 000 manatdır. Eyni zamanda, “Günaybank” ASC-yə məxsus daşınmaz əmlak da açıq hərraca çıxarılacaq. Əmlak Bakı şəhəri, Nərimanov rayonu, Koroğlu Rəhimov küçəsi, ev 3a ünvanında yerləşən, ilkin satış qiyməti 800 000 manat təşkil edən qeyri-yaşayış sahəsidir. Ümumi sahəsi 270,60 kvadratmetrdir.

Eyni tarixdə Fondun ləğvetməsində olan digər iki bankın balansında olan avtomobillər də satışa çıxarılacaq. “Muğanbank” ASC-yə məxsus 1999-cu il buraxılışlı, qeyri-işlək vəziyyətdə olan “FORD TRANSIT” markalı minik avtomobili 3 000 manat ilkin qiymətlə təklif olunur. “Yunayted Kredit Bank” ASC-yə məxsus, 2005-ci il buraxılışlı və qeyri-işlək vəziyyətdə olan “QAZ 31105 120” markalı minik avtomobilinin isə ilkin satış qiyməti 1 500 manatdır.

Qeyd olunur ki, bütün lotlar üzrə iştirak etmək istəyən şəxslər tərəfindən satış qiymətinin 5 faizi həcmində beh hərrac təşkilatına ödənilməlidir.

Mayya Hüseynova