Neftdə dalğalanma: Treyderlər yeni qiymət şokları proqnozlaşdırır

Qlobal neft bazarları yeni qeyri-sabitlik mərhələsinə daxil olub. Yaxın Şərqdə gərginliyin artması və eyni zamanda mövsümi tələbat azalması qiymətlərdə kəskin və gözlənilməz dalğalanmalara səbəb ola bilər. 

Valyuta.az xəbər verir ki, bu barədə “Financial Times” yazır.

Ticarət şirkəti “Gunvor”un rəhbəri Qari Pedersen bildirib ki, aprel–iyun dövründə volatillik (qiymət dəyişkənliyi) arta bilər. Onun sözlərinə görə, bu dövr qış mövsümünün yüksək tələbatı ilə yay avtomobil mövsümü arasındakı keçid mərhələsidir və qiymətlər fundamental göstəricilərdən çox xəbərlərə həssas olur.

“Bu, daha mürəkkəb və nisbətən zəif bir dövrdür. Açığını desək, bazar çox qeyri-sabit ola bilər”, deyə Pedersen deyib.

Beynəlxalq Enerji Agentliyinin (IEA) proqnozuna görə, ikinci rübdə neft tələbatı gündə 1,5 milyon barel azalacaq. Bu, COVID-19 pandemiyasından bəri ən böyük azalma sayılır. Neft İxrac Edən Ölkələr Təşkilatı (OPEC) isə daha yumşaq azalma – təxminən 500 min barel gözləyir.

“Gunvor”un məlumatına görə, şirkət artıq birinci rübdə 1,6 milyard dollardan çox ümumi gəlir əldə edib ki, bu da ötən illə müqayisə edilə biləcək səviyyədir.

Pedersen bildirib ki, şirkət 2022-ci ildə Rusiya–Ukrayna müharibəsindən sonra yaranan bazar şoklarını nəzərə alaraq risklərini yenidən qurub və fiziki neft ticarətinə üstünlük verib. Bu, qiymət dalğalanmalarına qarşı daha dayanıqlı strategiya hesab olunur.

Fyuçers bazarında qiymətlər düşsə də, fiziki neft bazarında gərginlik qalır. Alıcılar Fars körfəzindən alternativ tədarük mənbələri axtarır. Pedersenin sözlərinə görə, ABŞ prezidenti Donald Trampın siyasi açıqlamaları da bazar dinamikasına təsir göstərir.

Paşa Məmmədli