“Nissan”ın CEO-su stressi idarə etmək üçün istifadə etdiyi təəccüblü vərdişləri açıqlayıb

8,5 milyard dollarlıq avtomobil istehsalçısı olan “Nissan”da baş icraçı direktor İvan Espinosa sevdiyi hobbilərlə məşğul olaraq dincəlir.

“Stressi necə idarə edirəm? Mən sadəcə özüm olaraq qalmağa çalışıram”, — Espinosa “The Wall Street Journal”a son müsahibəsində deyib. “Həftəsonları tennis oynamağı sevirəm. Əgər bu mümkün olmursa, qolf oynayıram. Bundan əlavə, mən musiqiçiyəm.”

Espinosa bildirib ki, zərb alətində ifa etməyi sevir. “Bir musiqi qrupum var, arabir bir araya gəlirik və bir müddət ifa edirik”, — o deyib. “Bu, mənə real qalmağa və özümə sadiq olmağa kömək edir.”

“Nissan Motor”un prezidenti və CEO-su İvan Espinosa 14 aprel 2026-cı ildə Kanaqava prefekturasının Yokohama şəhərində yerləşən qlobal qərargahda keçirilən media brifinqində şirkətin uzunmüddətli vizyonunu təqdim edib.

Espinosa “Nissan”dakı karyerasına 2003-cü ildə şirkətin Meksika planlaşdırma bölməsində məhsul mütəxəssisi kimi başlayıb. Sonrakı illərdə Tayland və Avropada müxtəlif mühüm vəzifələrdə çalışıb, 2016-cı ildə isə Yaponiyada yerləşən qlobal qərargaha qoşulub. Bir neçə yüksək rəhbər vəzifədə çalışdıqdan sonra ötən ilin aprelində CEO postuna təyin olunub.

Bir neçə ölkəni əhatə edən və məsuliyyət səviyyəsinin daim artdığı belə sürətli karyerada stress qaçılmazdır. Lakin o, musiqi, idman və fiziki fəaliyyət vasitəsilə tarazlıq tapa bildiyini deyir.

Digər biznes liderləri stressi necə idarə edir?

Dəriyə qulluq brendi olan “Heyday”in keçmiş CEO-su və həmtəsisçisi Adam Ross da Espinosa ilə eyni üsula — idmana üstünlük verir. O, 2023-cü ildə “Fortune” jurnalına bildirib ki, idman onun üçün “emosional boşalma vasitəsidir”.

Bu, bir çox rəhbər şəxslər üçün əsas ritual hesab olunur. “Four Seasons Hotels and Resorts”un CEO-su Alexandro Reynal ötən il “Harvard Business Review”a deyib ki, fiziki hazırlıq onun liderlik rejiminin mərkəzində dayanır. O, səhərlərini məşqlə başlayır və günə başlamazdan əvvəl enerji toplamaq üçün sakit anlar ayırır.

“Rejim məni ayaqda saxlayır: səhərlər erkən dururam, idman edirəm və ya çimərlikdə qaçıram, ailəmlə səhər yeməyi yeyirəm və gün başlamazdan əvvəl bir neçə sakit dəqiqə keçirirəm”, — Reynal bildirib. “Məqsədinizlə yenidən bağ qurduqda və etdiyimiz işin təzyiq yox, insanlar haqqında olduğunu xatırladıqda stressin çoxu yox olur.”

“Curiosity Lab” vençur studiyasının qurucusu və CEO-su Maykl Tennant isə stressi nəzarətdə saxlamaq üçün dəqiq səhər ritualı formalaşdırıb. O, 2023-cü ildə “Fortune”a deyib ki, səhər saat 03:00-da oyandıqdan qısa müddət sonra hazırlaşır, meditasiya edir, gündəlik yazır və günün əsas prioritetini müəyyənləşdirir. O, səhər saatlarını ilham verən yaradıcı işlərə ayırır, daha sonra isə rəhbərliyin daha çətin tərəflərinə keçir.

Tennant bildirib ki, bu rutin onun rifahı üçün əsas rol oynayır. Bu vərdiş ona vəziyyəti dəyərləndirmək, prioritetləri müəyyən etmək və hər gün məqsədyönlü addımlar atmaq üçün aydınlıq verir.

“Oxidizers” şirkətinin qurucusu Kit Lambert də çox erkən oyanır — bəzi günlərdə saat 03:30-da. O, özünü daim hərəkətdə olan biri kimi təsvir edir.

“Oyanan kimi hərəkət etməyə başlayıram”, — Lambert “Business Insider”ə deyib. O, gününü gəzmək, biznesini idarə etmək və ailəsi ilə vaxt keçirməklə keçirir, stressi isə “balanslı həyat sürməyə çalışmaqla” idarə etdiyini bildirir.

Tənzilə Ağabalayeva