Sahibi vəfat edən və ya unudulan bank hesablarındakı pullar kimə çatır?

Bank hesabında qalan vəsaitin taleyi bəzi hallarda müzakirə mövzusuna çevrilir. Xüsusilə hesab sahibinin vəfat etməsi və ya illərlə istifadə olunmayan hesabların mövcudluğu vətəndaşlar arasında suallar yaradır.

Sahibi ölmüş və ya hesabı unutmuş şəxslərin pulları hara gedir? Banklar bu pulları dövlətə qaytarır?

Valyuta.az-a danışan bank məsələləri üzrə ekspert Cəfər İbrahimli bildirib ki, hesab sahibi vəfat etdikdə, digər əmlak və hüquqlar kimi, bank hesabında olan vəsaitlər də mirasçılara keçir:

"Miras bölgüsü zamanı mərhumun hesabının yerləşdiyi bankda həmin hesab bağlanır və hesabda qalan vəsaitlər qanunvericiliyin tələblərinə uyğun olaraq mirasçılar arasında bölüşdürülür. Şəxsin bank hesabını itirməsi və ya unutması halında isə yanaşma fərqlidir. Vətəndaş hesabını unutmuş olsa da, bu, onun həmin hesabdakı vəsaitdən istifadə etmək hüququnu itirməsi demək deyil. O, istənilən vaxt şəxsiyyət vəsiqəsi ilə banka müraciət edərək identifikasiya prosedurundan keçə, məlumatlarını təsdiqlədə və hesabını yenidən aktivləşdirə bilər. Bundan sonra hesabdakı vəsaiti istifadə edə və ya nağd şəkildə çıxara bilər. Əgər vətəndaş hər hansı bankda hesabının və vəsaitinin olduğunu unutmuş və həmin vəsaiti götürməmişdirsə, bank fəaliyyət göstərdiyi müddətdə hesab aktiv qalır və vəsait vətəndaşın adına saxlanılır. Bu vəsait heç bir halda dövlətə qaytarılmır. Yalnız bankın bağlanması və ya ləğvi halında həmin hesablarda qalan vəsaitlərin taleyi ilə bağlı müvafiq prosedurlar tətbiq olunur. Bu zaman vətəndaşlar müəyyən edilərək onlarla əlaqə saxlanılır və vəsaitlərin sahiblərinə qaytarılması təmin edilir. Bank fəaliyyətini davam etdirdiyi müddətdə isə müştərinin vəsaiti hesabda qalır və hüquqi baxımdan ona məxsus hesab olunur".

Mayya Hüseynova