“Spotify” kitab satışına başlayıb

“Spotify” səsli kitab sahəsinə yatırımlarını genişləndirərək artıq platforma üzərindən fiziki kitab satışına da start verib.

Valyuta.az xəbər verir ki, yeni funksiya ilkin mərhələdə ABŞ və Böyük Britaniyada istifadəyə verilib. Şirkət bununla rəqəmsal kontent və çap kitab təcrübəsini eyni ekosistemdə birləşdirməyi hədəfləyir.

Yenilik “Spotify” ilə müstəqil kitab mağazalarını dəstəkləyən “Bookshop.org” əməkdaşlığı çərçivəsində istifadəyə verilib. İstifadəçilər səsli kitab səhifəsində fiziki nüsxəni almaq seçimi ilə qarşılaşacaq və alış üçün “Bookshop.org” platformasına yönləndiriləcəklər.

Hazırda funksiya Android istifadəçiləri üçün aktivdir, iOS versiyasında isə yaxın zamanda istifadəyə veriləcəyi bildirilir.

Şirkət eyni zamanda “Page Match” funksiyasını da genişləndirib. Bu funksiya istifadəçilərə kitab səhifəsini telefon kamerası ilə skan edərək səsli kitabda qaldıqları hissəyə keçməyə imkan verir. Sistem artıq 30-dan çox dili dəstəkləyir.