800 milyard "Yeni Delta": Misir ölkə tarixinin ən böyük kənd təsərrüfatı layihəsini işə saldı

Misir prezidenti Əbdülfəttah əs-Sisi ölkə tarixinin ən böyük kənd təsərrüfatı layihələrindən biri olan “Yeni Delta” layihəsini rəsmi olaraq açıb. Layihə səhradan geri alınan ərazilərdə buğda və digər kənd təsərrüfatı məhsullarının yetişdirilməsini nəzərdə tutur. 

Valyuta.az xəbər verir ki, bu barədə Agrobiznes.ro yazır.

Açılış mərasimi 2026-cı il buğda yığım kampaniyası çərçivəsində, Nil deltası qərbində yerləşən yeni kənd təsərrüfatı sahələrində keçirilib. Misir hökumətinin məlumatına görə, “Yeni Delta” ölkə tarixində ən böyük torpaq meliorasiyası layihəsidir. Gələcəkdə yeni əkin sahələrinin ümumi həcmi təxminən 9 min kvadrat kilometrə çatacaq.

Layihə nəticəsində ölkədə becərilən torpaqların ümumi sahəsi təxminən 15% artacaq. Əsas fokus buğda, qarğıdalı, tərəvəzlər və ixrac üçün zeytun və əncir kimi məhsulların yetişdirilməsidir.

Layihənin ümumi dəyəri artıq 800 milyard Misir funtu (15 milyard dollardan çox) təşkil edir. Bu vəsait torpaqların hazırlanması, anbarlar, sənaye zonaları və yeni yolların tikintisinə sərf olunub. Rəsmilər layihənin 2 milyondan çox iş yeri yaradacağını bildirir. Layihənin əsas elementi geniş su təchizatı sistemidir. Bu sistem artıq “süni çay” kimi adlandırılır.

Drenaj kanallarından toplanan su “Əl-Həmmam” təmizləmə stansiyasında gündə 7,5 milyon kubmetr həcmdə təmizlənir. Daha sonra 170 kilometrlik kanal və 13 nasos stansiyası vasitəsilə səhraya yönəldilir.

Misir hökuməti bu layihəni ərzaq təhlükəsizliyi üçün strateji addım kimi qiymətləndirir. Bu, xüsusilə COVID-19 pandemiyası və Ukrayna və İranla bağlı müharibələrdən sonra yaranan qlobal risklər fonunda önəmli sayılır.

Ekoloqlar isə layihənin yüksək enerji sərfiyyatı, böyük maliyyə yükü və hərbi strukturlara yaxın idarəetmə səbəbindən narahatlıqlarını bildirirlər.

Paşa Məmmədli