"Coursera" və “Udemy” 2,5 milyard dollarlıq razılaşma ilə birləşir

Onlayn təhsil sektorunun iki aparıcı platforması - "Coursera" və “Udemy” - təxminən 2,5 milyard ABŞ dolları dəyərində razılaşma əsasında birləşmək qərarına gəlib.

Valyuta.az xəbər verir ki, uzun müddətdir müzakirə olunan bu proses 2026-cı ilin ikinci yarısında, müvafiq tənzimləyici və səhmdar təsdiqləri alındıqdan sonra tamamlanacaq.

Birləşmədən sonra yeni qurum fəaliyyətini “Coursera” adı və "COUR ticker"i ilə Nyu-York Fond Birjasında davam etdirəcək.

Bu qərar, pandemiyadan sonra böyümə tempi zəifləyən onlayn təhsil bazarında investorların daha ehtiyatlı davrandığı bir mərhələyə təsadüf edir. Gəlir artımına baxmayaraq, həm "Coursera"nın, həm də “Udemy”nin səhmləri uzun müddətdir təzyiq altındadır. Şirkətlər birləşmə ilə miqyas, maliyyə səmərəliliyi və məhsul çeşidliliyi baxımından daha güclü struktur formalaşdırmağı qarşıya məqsəd qoyur. Tərəflər illik təxminən 115 milyon dollarlıq əməliyyat sinerjisi əldə olunacağını proqnozlaşdırır.

Strateji baxımdan, "Coursera" və “Udemy”nin iş modelləri bir-birini tamamlayır. "Coursera" daha çox universitetlər, müəssisələr və sertifikat proqramları ilə institusional yanaşma təklif etdiyi halda, “Udemy” fərdi təlimçilərin təqdim etdiyi kurslarla bazar yönümlü platforma kimi fəaliyyət göstərir. Birləşmə nəticəsində fərdi istifadəçilər və şirkətlər üçün vahid platforma üzərindən daha geniş təlim həlləri təqdim olunması nəzərdə tutulur.

Birləşmənin əsas istiqamətlərindən biri isə süni intellekt texnologiyalarının inteqrasiyasıdır. Hər iki şirkət iş dünyasında süni intellekt üzrə bacarıqların əhəmiyyətinin sürətlə artdığını vurğulayır. "Coursera"nın “ChatGPT” ekosistemi və “Anthropic” ilə əməkdaşlığı, “Udemy”nin isə fərdiləşdirilmiş və süni intellekt dəstəyi ilə təkmilləşdirilmiş mikro öyrənmə təcrübəsi bu istiqamətdə birləşərək daha çevik və məlumat yönümlü təhsil infrastrukturu yaratmağı hədəfləyir.

Yeni qurumun əsas məqsədlərindən biri də müəssisələrin əməkdaş təlimi və yenidən bacarıq qazandırma proqramlarına ayırdığı büdcədən daha böyük pay qazanmaqdır. Süni intellektin peşə bacarıqları xəritəsini sürətlə dəyişdirdiyi dövrdə, Coursera–“Udemy” birləşməsi onlayn təhsilin növbəti mərhələsinə keçidin əsas göstəricisi kimi qiymətləndirilir.

Mayya Hüseynova