İslandiyadan Münhenə: Soloturistlər üçün Avropada ən yaxşı 5 məkan

Aparılan son araşdırma göstərib ki, insanlar qrup çatlarında tətil planlarını uzun-uzadı müzakirə etməkdən yorulduqları üçün getdikcə daha çox təkbaşına səyahət etməyə üstünlük verirlər. Bununla belə, mütəxəssislər xəbərdarlıq edirlər ki, bütün məşhur turizm istiqamətləri soloturizm üçün uyğun deyil.

Valyuta.az xəbər verir ki, bu fonda dünyanın ən böyük səyahət nəşriyyatı olan "Lonely Planet"in ekspertləri 2026-cı ildə Avropada təkbaşına kəşf üçün ən uyğun beş məkanı müəyyənləşdiriblər.

1. İslandiya – təhlükəsizlik, muzeylər və təbiət

Bu qeyri-adi ölkə dəfələrlə dünyanın ən təhlükəsiz ölkəsi və Yer üzündə ən xoşbəxt məkanlardan biri kimi tanınıb. Paytaxt Reykyavik bunun bariz nümunəsidir. Şəhərin köhnə mərkəzi kosmopolitliklə rahatlığı birləşdirir: burada çoxsaylı tarixi muzeylər, keyfiyyətli restoranlar, səmimi kafelər və qış qaranlığını canlandıran pastel rənglərə boyanmış, dalğalı dəmir örtüklü evlər var.

Eyni zamanda, İslandiyanın saysız-hesabsız piyada marşrutlarında soloturistlər üçün demək olar ki, heç bir təhlükə yoxdur. Ölkədə insanlardan çəkinən yeganə yırtıcı vəhşi məməli arktik tülküdür.

2. Lissabon, Portuqaliya – mehribanlıq və səmimilik

Bəzi paytaxtlar öz ölçülərinə və soyuq atmosferinə görə tək səyahətçiləri sıxa bilər. Lakin Portuqaliyanın paytaxtı Lissabon bütün qonaqları isti qarşılayır. Şəhər özünəməxsus işığı, Atlantik okeanından gələn meh və dar, azuleju plitələri ilə döşənmiş küçələrdə asta-asta hərəkət edən köhnə tramvayları ilə dərhal əhval-ruhiyyəni yüksəldir.

Gözəlliyi ilə yanaşı, Lissabon sakit, mehriban və ünsiyyətcil bir şəhərdir. Təpəli relyef şəhəri kiçik, kəndi xatırladan məhəllələrə bölür ki, bu da ona bir çox iri şəhərlərdə çatışmayan səmimilik qazandırır.

3. Alonissos, Yunanıstan – gözəllik və sakitlik

Digər Yunan adaları ilə müqayisədə daha sakit və daha vəhşi olan Şimali Sporad adalarındakı Alonissos soloturistlərə eyni dərəcədə heyranedici mənzərələr təqdim edir: şam meşələri ilə örtülü parçalanmış körfəzlər və firuzəyi dəniz.

Günlük turistlərin və böyük izdihamların olmaması burada xüsusilə qonaqpərvər bir mühit yaradır. Bu da tək səyahət edənlərə körfəzdən tavernaya qədər uzanan sakit yunan həyat ritmindən zövq almağa imkan verir.

4. Mis sahili, İrlandiya – təbiət, kompaktlıq və rahatlıq

İrlandiyanın cənubunda yerləşən bu sahil zolağı haqqında çoxları eşitməyib. Halbuki bu, getdikcə daha sıx olan "Wild Atlantic Way" marşrutuna sakit və az tanınan, lakin heç də az gözəl olmayan alternativdir. Vaterford qraflığında Kilfarrasi ilə Stradbelli arasında uzanan 25 kilometrlik sahil xətti gur dalğalar, qabarma-çəkilmə prosesləri, 460 milyon illik süxurlar və tarixi mis mədənləri ilə seçilir. Bu ərazi UNESCO-nun Ümumdünya Geoparkı statusuna malikdir.

Soloturistlər üçün əsas üstünlük ərazinin kompakt olmasıdır. Avtomobil idarə etməsəniz belə, sahili velosipedlə və ya piyada rahatlıqla gəzə bilərsiniz. Turistlərin azlığı isə hər yerdə isti və səmimi münasibət yaradır.

5. Münhen, Almaniya – muzeylər, parklar və pivə

Bavariyanın mərkəzi təkcə hər il keçirilən Oktoberfestdə pivə bokallarının cingiltisi ilə məhdudlaşmır. Şəhərdə 80-dən çox muzey fəaliyyət göstərir: müxtəlif dövrlərin incəsənətini nümayiş etdirən üç Pinakotekadan tutmuş "BMW" Muzeyində avtomobil tarixçəsinə qədər.

Münhendə açıq havada vaxt keçirmək üçün də geniş imkanlar var: velosiped sürmək, parklarda piknik etmək və saysız-hesabsız pivə bağlarında dincəlmək mümkündür. Bundan əlavə, şəhərdən kənara birgünlük səfərlər üçün də əlverişli nəqliyyat əlaqələri mövcuddur. Məsələn, qatarla Almaniyanın ən yüksək zirvəsi olan Tsugşpitsə qalxmaq və ya Tegernze gölü kənarındakı mənzərəli şəhərciyə baş çəkmək olar.

Soloturistlər üçün faydalı məsləhətlər

Daha əvvəl səyahət mütəxəssisləri təkbaşına səyahət edənlər üçün istirahəti maksimum rahat edəcək 10 əsas tövsiyə paylaşıblar. Təcrübəli soloturist Kristina Fordun fikrincə, ən böyük səhvlərdən biri ilk tək səfərə həddindən artıq çox plan sığdırmağa çalışmaqdır. Səyahət jurnalisti Cenna De-Laurentis isə soloturizm zamanı tənha qalma hissini necə aşmağın yolları ilə bağlı məsləhətlər verib.

Paşa Məmmədli