Doqquz oturacaqlı kiçik içki köşkündən qlobal hotel biznesinə uzanan yol - SƏHƏR OXUSU

Bu gün milyonlarla insanın tanıdığı “Marriott” adı bir vaxtlar cəmi doqquz oturacaqlı kiçik içki köşkü idi. Dünyanın ən böyük hotel qruplarından birinə çevrilən bu brendin arxasında sadə başlanğıc, düzgün zamanlama və dayanmayan inkişaf dayanır.

İlk addım 1927-ci ildə kiçik köşk

1927-ci ildə J. Willard Marriott və həyat yoldaşı Alice Marriott Vaşinqtonda “A&W Root Beer” köşkü açdılar. Köşk cəmi doqquz yerlik idi. Yayın isti günlərində soyuq içkilərə tələbat yüksək olduğundan biznes qısa müddətdə maraq gördü. Alice Marriott isə ilk gündən mühasiblikdən mətbəxə qədər bir çox işi özü idarə edirdi.

Köşkdən restorana keçid

Mövsümi satışdan asılı qalmamaq üçün menyuya isti yeməklər əlavə edildi. Bununla da biznesin adı “Hot Shoppes” oldu. Sonrakı illərdə bu restoranlar sürətlə böyüdü və Vaşinqton ətrafında bir neçə filial açıldı. Şirkət xidmət keyfiyyəti və sürətli servis modeli ilə seçilirdi.

Böyük dönüş nöqtəsi hotel biznesi

1957-ci ildə şirkət ilk hotelini açdı - “Twin Bridges Motor Hotel”. Bu addım Marriott tarixində ən vacib dönüş nöqtəsi sayılır. Çünki restoran biznesində qazandığı xidmət təcrübəsi hotel sektorunda da uğur gətirdi. Sonrakı onilliklərdə “Marriott” ABŞ-dan kənara çıxaraq beynəlxalq bazarlara daxil oldu.

Qlobal imperiyaya çevrilməsi

İllər ərzində şirkət onlarla yeni marka yaratdı və müxtəlif hotel seqmentlərinə daxil oldu. Bu gün “Marriott International” dünyanın ən böyük qonaqpərvərlik şirkətlərindən biri hesab olunur və yüzlərlə şəhərdə fəaliyyət göstərir. Bir vaxtlar kiçik köşk kimi başlayan biznes qlobal imperiyaya çevrildi.

Mayya Hüseynova