"Ford" bir milyondan çox avtomobilini geri çağırır

ABŞ-nin avtomobil istehsalçısı Ford Motor Company ölkədə təxminən 1,4 milyon ədəd F-150 pikap modelini geri çağırır. Buna səbəb avtomobillərdə qəfil ötürücü dəyişməsi ilə bağlı aşkar olunan texniki nasazlıqdır.

Valyuta.az xəbər verir ki, bu barədə National Highway Traffic Safety Administration (NHTSA) məlumat yayıb. Bildirilib ki, problem bəzi hallarda avtomobilin gözlənilmədən aşağı ötürücüyə keçməsinə səbəb ola bilər.

Tənzimləyici qurumun açıqlamasına görə, məsələ ilə bağlı bir qəza və iki mümkün xəsarət hadisəsi qeydə alınıb. Problemin aradan qaldırılması üçün diler mərkəzlərində avtomobillərin güc ötürmə idarəetmə modulunun proqram təminatı yenilənəcək.

Araşdırma ilk dəfə ötən ilin mart ayında 2015–2017-ci il buraxılışlı, 6R80 transmissiyalı F-150 modelləri üzrə daxil olan şikayətlər əsasında başlanmışdı. Daha sonra yoxlama genişləndirilib.

Şirkət bildirib ki, nasazlığın əsas səbəbi istilik və vibrasiya nəticəsində sensor bağlantılarının zamanla zəifləməsidir. Bu isə ötürücü sensorundan yanlış siqnalların göndərilməsinə və qəfil sürət dəyişməsinə gətirib çıxara bilər.