Avropada avtomobil istehsalı "ölür": Ən böyük zavodlardan biri istehsalı dayandırır

Fransanın Puassi şəhərində yerləşən Avropanın ən böyük avtomobil zavodlarından biri avtomobil istehsalını dayandıracaq. 

Valyuta.az xəbər verir ki, bu barədə “Profit.ro” yazır.

Məlumata görə, zavod Ford tərəfindən II Dünya müharibəsindən əvvəl tikilib, sonradan "Chrysler" və "Peugeot"un tərkibində olub, 2021-ci ildən isə “Stellantis” konserninə daxildir.

İllik 500 min avtomobil istehsal gücünə malik olmasına baxmayaraq, şirkət rəhbərliyi bu müəssisədə avtomobil yığımını dayandırmaq qərarı verib.

“2028-ci ildən etibarən burada artıq avtomobil istehsal olunmayacaq”, deyə şirkət nümayəndələri bildirib.

Rəsmilər qərarı Avropada istehsal gücünün artıq həddə çatması və 2019-cu illə müqayisədə avtomobil bazarında təxminən 20 faiz azalma ilə izah edirlər.

Şirkətin planına görə, zavod tam bağlanmayacaq, lakin funksiyası dəyişdiriləcək. “Stellantis” təxminən 100 milyon avro investisiya edərək müəssisəni kuzov hissələrinin istehsalı və işlənmiş avtomobillərin emalı mərkəzinə çevirməyi planlaşdırır.

Lakin işçilər üçün vəziyyət çətindir. Təxminən 600 nəfərin “könüllü ayrılma” və təqaüd proqramları ilə işdən çıxarılması nəzərdə tutulur.

Həmkarlar ittifaqları isə yeni fəaliyyət sahələrinin cəmi 200–300 işçiyə ehtiyac duyacağını bildirərək təxminən 1900 işçinin taleyinin risk altında olduğunu vurğulayır. Bu səbəbdən yaxın həftələrdə genişmiqyaslı etiraz və tətil ehtimalı da gündəmdədir.

Paşa Məmmədli