"Françayzinqdə onlayn ticarət sürətlə artır”

Camid Mövsümov
Azərbaycan Françayzinq Assosiasiyası İdarə heyətinin sədri

Son illərdə biznes dünyasında müşahidə olunan sürətli dəyişikliklər sahibkarların seçimlərinə də ciddi təsir göstərir. Artıq texnologiyaya uyğunlaşan və uzunmüddətli perspektiv vəd edən istiqamətlər ön plana çıxır. Xüsusilə françayzinq modeli bu baxımdan həm daha təhlükəsiz başlanğıc, həm də daha sistemli inkişaf imkanı təqdim edir. Məhz bu dəyişikliklərin məntiqi davamı olaraq, dünyada olduğu kimi ölkəmizdə də françayzinq yeni dövrə keçid edir.  

“Yeni dövr françayzinqində” rəqəmsal modellərin françayzinqinin verilməsi reallığa çevrilir. Ölkəmizdə son dövrdə sürətli şəkildə inkişaf edən startup və fintech-lərin françayzinq modellərinin hazırlanması və tətbiqi mümkündür.

Ticarət ənənəvi ticarətdən onlayn ticarətə keçir. Bu proses olduqca sürətlə baş verir. Məsələn, hər nə qədər ölkəmizdə tətbiq olunmasa da, hal-hazırda ən aktiv sosial şəbəkə hesab olunan “TikTok” öz rəqəmsal marketini açıb. “TikTok Shop” adlı bu market Azərbaycanda hələ ki aktiv çalışmasa da, dünyada olduqca məşhur ticarət aləti hesab olunur.

Artıq “Alibaba”, “Amazon” kimi elektron ticarət platformalarında hər hansı bir markanın françayzinqini alaraq onlayn mağaza açmaq mümkündür. Pandemiya elektron xidmətlərə qarşı marağı olduqca artırdı. Nəticədə, onlayn xidmət verən şirkətlərin sayı dünyada və ölkəmizdə olduqca artım göstərdi. Əgər öncələri hər hansı bir alış və ya xidmətdən istifadə etmək üçün filiallara müraciət edirdiksə, artıq hər bir əməliyyatı, alışı ağıllı telefonumuzla edə bilirik.

İkinci bir sahə daşınmaz əmlak sahəsidir. Bu sahə də son dövrlərdə olduqca sürətli şəkildə inkişaf edir. Yerli inşaat şirkətlərimiz xarici bazarlara ciddi şəkildə investisiya edirlər. Bu da öz növbəsində daşınmaz əmlakın satışı və idarə olunması işini fərqli inkişaf mərhələsinə keçirir.

Artıq ənənəvi əmlak ofisləri yerini biznes modeli olan, hədəfi yalnız sizə satış etmək deyil, həmçinin əlinizdəki mövcud əmlakı dəyərləndirən və maddi vəsait qazanmağınıza dəstək olan bir alətə çevirir. Bu əmlak ofisləri çox rahat şəkildə öz biznes modellərini və markalarının françayzinqini verərək həm bazara yeni biznes gətirir, həm də françayzinq vasitəsilə özləri çox sürətli inkişaf edirlər.

Qonşu ölkələrimiz olan qardaş Türkiyə və Rusiya da bu model çox böyük inkişaf yolu keçmişdir. Ölkəmizdə son dövrlərdə bu biznes sahəsi maraq cəlb edir. Düşünürəm ki, yaxın 3 ildə bu bizneslə bağlı çox ciddi rəqəmlər müzakirə edə biləcəyik.