İnvestorlar qızıldan üz döndərir: Müharibəyə görə metalın qiymətləri enir

Qızılın qiyməti bazar ertəsi, 6 aprel tarixində, dolların güclənməsi fonunda ucuzlaşıb. Buna İranda davam edən müharibə səbəbindən neftin bahalaşması və ABŞ əmək bazarından gələn gözləniləndən daha güclü göstəricilər də təsir edib. Bu faktorlar Federal Ehtiyat Sisteminin (FES) faiz dərəcələrini endirəcəyi ilə bağlı gözləntiləri azaldıb.

Valyuta.az xəbər verir ki, “Reuters”in yazdığına görə, spot qızıl 0,5% ucuzlaşaraq unsiya üçün 4 652,89 dollara (qram üçün 149,62 dollar) düşüb. ABŞ-da apreldə təhvil üçün qızıl fyuçersləri isə Asiya və Avropa bazarlarının bayram səbəbilə bağlı olduğu bir vaxtda zəif ticarət şəraitində 4 678,70 dollar (qram üçün 150,43 dollar) səviyyəsində sabit qalıb.

3 aprel tarixində açıqlanan məlumatlara əsasən, ABŞ-də kənd təsərrüfatı sektoru istisna olmaqla məşğulluq mart ayında 178 min nəfər artıb ki, bu da 2024-cü ilin dekabrından bəri ən yüksək göstəricidir. Eyni zamanda işsizlik səviyyəsi 4,3%-ə enib. ABŞ Xəzinədarlığının 10 illik istiqrazlarının gəlirliliyi və dollar indeksi yüksəldiyi üçün qızıl üzərində təzyiq artıb.

Neft qiymətləri isə ABŞ və İsrailin İrana qarşı müharibəsinin qlobal enerji tədarükünü pozmağa davam etməsi fonunda Brent markalı neftin bahalaşması ilə yüksəlib.

Neftin sürətli bahalaşması inflyasiya ilə bağlı narahatlıqları artırır. Qızıl ənənəvi olaraq inflyasiyaya qarşı qorunma vasitəsi sayılsa da, yüksək faiz dərəcələri gəlir gətirməyən aktivlərə tələbi azaldır. Treyderlər isə FES-in bu il faiz endirimi etmə ehtimalını demək olar ki, tam istisna ediblər. Müharibədən əvvəl iki faiz endirimi gözlənilirdi.

Eyni zamanda gümüşün spot qiyməti 0,9% azalaraq unsiya üçün 72,34 dollara (qram üçün 2,33 dollar) düşüb, platin 0,6% ucuzlaşaraq 1 977,29 dollar (qram üçün 63,56 dollar) olub, palladium isə 0,3% bahalaşaraq 1 500,25 dollar (qram üçün 48,23 dollar) səviyyəsinə yüksəlib.

Paşa Məmmədli