Səudiyyə Ərəbistanı neft qiymətlərini rekord səviyyəyə qaldırır

Səudiyyə Ərəbistanı Asiyaya ixrac edilən əsas neft markasının qiymətini Hörmüz boğazının demək olar ki, bağlanması və Yaxın Şərqdə müharibənin nə zaman bitəcəyinə dair qeyri-müəyyənlik fonunda rekord səviyyəyə qaldırır. 

Valyuta.az xəbər verir ki, bu barədə “Bloomberg” məlumat yayıb.

Dövlət neft şirkəti “Saudi Aramco” may tədarükləri üçün Asiya neft emalı zavodlarına satılan əsas “Arab Light” markasının qiymət fərqini 19,5 dollar/barel səviyyəsinə qaldıracaq.

Bu göstərici aprel ayı ilə müqayisədə təxminən 8 dəfə yüksəkdir, çünki həmin dövrdə premia 2,5 dollar/barel idi. Eyni zamanda, “Bloomberg”in sorğu keçirdiyi treyderlər və neft emalı zavodları bu artımın 40 dollar/barel səviyyəsinə qədər yüksələ biləcəyini gözləyirdi.

Müharibənin başlamasından sonra Brent markalı neftin qiyməti 50 faizdən çox artıb, ABŞ-dan Avropa və Asiyaya qədər yanacaq qiymətləri isə kəskin bahalaşıb.

2 martda İran Hörmüz boğazının bağlandığını elan edib. 4 aprel tarixində isə Tehran müəyyən yük kateqoriyaları üçün boğazın qismən açılmasına hazır olduğunu bildirib. Boğazda nəqliyyatın məhdudlaşması və Yaxın Şərqdə döyüşlərin davam etməsi neft qiymətlərini daha da yüksəldib. 2 aprel tarixində Brent nefti 108 dollar/barel səviyyəsini keçib.

Paşa Məmmədli