"iPhone 18" vaxtından gec satışa çıxacaq və texniki göstəriciləri zəifləyəcək

“Apple” gələcək "iPhone 18" seriyasına yanaşmasını ciddi şəkildə dəyişə bilər. Məlumatlara görə, baza model həmişəkindən daha gec təqdim ediləcək və maya dəyərini azaltmağa yönəlmiş bir sıra dəyişikliklər alacaq.

Valyuta.az xəbər verir ki, "9to5mac" məlumatına əsasən, şirkət daha ucuz çiplər, yaddaş modulları və sadələşdirilmiş istehsal proseslərindən istifadə etməyi planlaşdırır. Nəticədə, əsas "iPhone 18" texniki xüsusiyyətlərinə görə daha ucuz "iPhone "18e modelinə daha yaxın olacaq.

Eyni zamanda bildirilir ki, istehsal xərclərinin azalması telefonun satış qiymətinin aşağı düşməsinə səbəb olmayacaq. Bu addımın əsas məqsədi operativ yaddaş və digər komponentlərin bahalaşması fonunda istehsal xərclərini azaltmaqdır.

Hansı konkret sadələşdirmələrin ediləcəyi hələ açıqlanmayıb. Məsələn, "iPhone 17" modeli ilə "iPhone 17e" arasında ekran ölçüsü, kamera sistemi, batareya ömrü və 120 Hz dəstəyi, Dynamic Island kimi “Pro” funksiyaları fərqlənirdi.

Gözləntilərə görə, "iPhone 18" seriyasının təqdimatı iki mərhələyə bölünəcək. 2026-cı ilin payızında daha bahalı flaqman modellər – "iPhone 18 Pro", "iPhone 18 Pro Max" və "iPhone Fold" təqdim olunacaq. Əsas "iPhone 18", həmçinin "iPhone 18e" və "iPhone Air 2" isə 2027-ci ilin yazında satışa çıxacaq.

Paşa Məmmədli