Müştəri şikayətini şirkət necə fürsətə çevirə bilər?- Marketoloq

Hər bir biznes fəaliyyətində müştəri rəyləri xüsusi rol oynayır və bu rəylər hər zaman müsbət olmur. Qarşıya çıxan narazılıqlar isə düzgün yanaşma tələb edir və bu yanaşma brendin gələcək uğuruna birbaşa təsir göstərə bilər.

Bəs müştəri şikayətləri marketinq üçün necə fürsətə çevrilə bilər?

Marketoloq Samir Mehdiyev Valyuta.az-a bildirib ki, müştəri şikayətləri ilk baxışdan arzuolunmaz görünsə də, əslində marketinq strategiyasını təkmilləşdirmək və brend sadiqliyi yaratmaq üçün gizli xəzinədir:

“Bu rəylərə sadəcə həll edilməli problem kimi deyil, auditoriyanın real ehtiyaclarını anlamaq üçün unikal imkan kimi baxmaq lazımdır. Narazı bir müştərinin problemini, xüsusilə rəqəmsal platformalarda, operativ, şəffaf və peşəkar şəkildə həll etdiyimiz zaman, bu prosesi kənardan izləyən yüzlərlə potensial müştərinin gözündə ən güclü etibar reklamı yaranır. İnsanlar hər bir şirkətin səhv edə biləcəyini bilir, lakin fərqi yaradan brendin öz səhvinin arxasında necə dayanmasıdır”.

“Eyni zamanda, bu geri dönüşlər məhsul və xidmətlərin zəif tərəflərini aradan qaldırmaq, gələcək kampaniyaların mesajlarını daha düzgün qurmaq üçün ən dürüst məlumat mənbəyidir. Müştərilərin çətinliklərini analiz edərək fəaliyyəti təkmilləşdirmək və bu inkişafı auditoriya ilə səmimi şəkildə paylaşmaq böyük üstünlük qazandırır. Səhvlərini qəbul edib onları aradan qaldıran brend istehlakçı gözündə sadəcə bir şirkət olmaqdan çıxaraq empatiya qura bilən, etibarlı tərəfdaşa çevrilir. Uğurlu marketinq qüsursuz görünmək deyil, problemləri sadiqliyə və səmimi inama çevirə bilmək sənətidir”, – deyə marketoloq qeyd edib.

Tənzilə Ağabalayeva