Passiv gəlir yeri yaratmaq istəyənlər üçün 5 faydalı kitab - SƏHƏR OXUSU

Pul qazanmaq üçün mütləq hər gün işləmək lazımdırmı? “Passiv gəlir” anlayışı bu sualı tez-tez gündəmə gətirir. Bir çox insan üçün bu, hələ də uzaq və çətin görünən modeldir. Amma dünyada elə insanlar var ki, onlar aktiv işləmədən - yəni gəlirini “avtopilot” rejiminə keçirərək sabit qazanc əldə edə biliblər və bu təcrübələrini kitab halına salıblar.

Valyuta.az passiv gəlir mövzusunda yazılmış bəzi kitabları təqdim edir:

Passiv gəlir əsasən investisiyalar, daşınmaz əmlak, rəqəmsal məhsullar və ya biznes sistemləri vasitəsilə əldə olunur. Bu modeldə ilkin mərhələdə müəyyən əmək və zaman sərf edilsə də, əsas məqsəd sonradan minimum müdaxilə ilə gəlir əldə etməkdir. Yəni bir dəfə qurulan sistem uzun müddət qazanc gətirməyə davam edir.

Bu istiqamətdə ən çox diqqət çəkən kitablardan biri "The 4-Hour Work Week"dır. Müəllif Tim Ferriss ənənəvi iş modelini tənqid edərək göstərir ki, düzgün qurulmuş biznes və avtomatlaşdırma vasitəsilə daha az işləyib daha çox qazanmaq mümkündür. Kitabda real nümunələr və tətbiq oluna bilən strategiyalar yer alır.

Digər məşhur əsər "The Unemployed Millionaire" kitabıdır. Matt Morris burada öz həyat hekayəsini bölüşərək sıfırdan biznes qurmağın və passiv gəlir əldə etməyin mümkün olduğunu izah edir. Müəllifin yanaşması daha çox motivasiya və praktik addımlar üzərində qurulub.

Passiv gəlirə sistemli yanaşma təqdim edən kitablardan biri də "Passive Income Freedom"dır. Gundi Gabrielle bu kitabda yeni başlayanlar üçün konkret planlar təqdim edir və qısa müddətdə müəyyən gəlir səviyyəsinə çatmağın yollarını izah edir.

"Passive Income, Aggressive Retirement" kitabı isə maliyyə azadlığına daha real yanaşma təqdim edir. Rachel Richards oxuculara göstərir ki, passiv gəlir yalnız əlavə qazanc deyil, eyni zamanda həyat tərzini dəyişdirən maliyyə strategiyasıdır.

Fərqli yanaşma təqdim edən digər kitab "Quit Like a Millionaire"dır. Kristy Shen və Bryce Leung tərəfindən yazılan bu əsər FIRE (Financial Independence, Retire Early) modelini izah edir. Kitab qənaət, düzgün investisiya və maliyyə intizamı vasitəsilə erkən pensiyaya çıxmağın mümkün olduğunu göstərir.

Sərvanə Rəmixanova