ABŞ Hörmüz boğazı ilə bağlı riskləri azaltmaq üçün sığorta mexanizmini genişləndirir

Amerika Birləşmiş Ştatları Hörmüz boğazından keçən gəmilər üçün təkrar sığorta təminatı üzrə öhdəliklərini əhəmiyyətli dərəcədə artırmaq qərarı verib. Belə ki, ötən ay 20 milyard dollar səviyyəsində olan zəmanət limiti hazırda 40 milyard dollara qədər yüksəldilir.

Valyuta.az xəbər verir ki, bu barədə Bloomberg məlumat yayıb.

Məlumata görə, burada sığorta şirkətlərinin üzərlərinə götürdükləri risklərin bir hissəsini digər sığortaçılarla bölüşməsi nəzərdə tutulur. ABŞ bu prosesə həmçinin American International Group və Berkshire Hathaway kimi iri maliyyə qurumlarını da cəlb etməyi planlaşdırır.

Agentlik qeyd edir ki, bu addım strateji əhəmiyyətə malik dəniz marşrutu üzrə yaranmış riskləri azaltmaq və yükdaşımaların bərpasını sürətləndirmək məqsədi daşıyır. Xüsusilə, Hörmüz boğazından keçən gəmilərə olan etimadın yenidən formalaşdırılması ABŞ üçün prioritet istiqamətlərdən biri hesab olunur. Bununla belə, təqdim edilən maliyyə təminatları gəmi heyətinin təhlükəsizliyini təmin edən hərbi müşayiət xidmətlərini əhatə etmir.

Qeyd edək ki, regionda gərginlik son dövrlərdə daha da artıb. Fevralın 28-də İsrailin müdafiə naziri İsrael Kats ölkəsinin İsrail Müdafiə Qüvvələri tərəfindən İrana qarşı qabaqlayıcı zərbələr endirildiyini açıqlayıb. Ardınca ABŞ Prezidenti Donald Trump Vaşinqtonun da bu əməliyyatlarda iştirak etdiyini bəyan edib.

Buna cavab olaraq İran İsrail istiqamətinə çoxsaylı ballistik raketlər buraxıb. Hücumlar İsrail Müdafiə Qüvvələri tərəfindən təsdiqlənib, ölkə ərazisində hava həyəcan siqnalları verilib və müdafiə sistemləri aktivləşdirilib.

Martın 1-də isə İranın Ali Lideri Əli Xameneinin hücumlar zamanı həlak olması ilə bağlı məlumatlar yayılıb.

Eyni zamanda İran ABŞ-nin hərbi bazalarının yerləşdiyi bəzi qonşu ölkələrə raket zərbələri endirib. Bu səbəbdən bir sıra ölkələrdə hava məkanı müvəqqəti olaraq bağlanıb.

Baş verən hadisələr fonunda Hörmüz boğazından keçən gəmilərin hərəkətində ciddi çətinliklər yaranıb və qlobal yükdaşımalar üçün risklər artıb.